收音咪 + 耳仔　調聲快夾靚

不少用家都覺得擴音機設定繁複，Antony 就話其實唔難，靠支附送收音咪就得，「以前擴音機自動音場校正效果一般，要靚聲可能要靠 Sound Meter 獨立每隻喇叭調校，而且要有一定經驗先調得好。近幾年擴音機的自動音場校正進步好多，已經可以做得好準確，而且成個過程都幾快捷，買部機返來、插個收音咪，就識得自動開始校正程序。基本上自動校正完，效果已經好唔錯。」不過 Antony 都補充：「Auto 不是萬能，有時正確的聲音未必係自己鍾意的聲音，更好的自動調校都可能有誤差，呢個時候就要靠用家自己用耳仔聽，再手動去微調，不過功夫就已經少咗好多！」

分頻點、喇叭大小設定有竅妙

用收音咪調校完，擴音機就會做好基本喇叭設定，Antony 就話仲有部分細節要靠用家自己微調返，就可以更好聲。「例如 20Hz-20kHz 的座地前置喇叭，响擴音機入面正路會設定做『Large』，如果用衛星喇叭就設定做『Small』。不過將喇叭全部設定做『Small』、將更多低頻交畀超低音喇叭輸出，通常會更加好聲。分頻點都有少少類似，聲效校正完通常都會自動設定好每隻喇叭的分頻點，不過喇叭出到 60Hz 未必代表 60Hz 的音效夠好聲，所以有時要試下稍稍調高分頻點，睇下低音會唔會好咗，例如更加有力、有彈性、分析力提升等等，呢樣就要靠自己耳仔、播吓碟去聽去試，普通用家稍為聽幾次已經可以感受到分別。另外，80Hz、100Hz、120Hz 等都是比較常用的設定。」Antony 又笑說：「其實這些技巧，稍為資深的用家都識，不過入門用家就未必知道，有時會無從入手。」

偏好叉插好音質　Bi-Amp 不妨等升級

講完設定，咁接駁方面其實又有無咩方式可以提升音質？Antony 就話插頭、線材、接駁方式都可對音效有提升，部分成本好低、好值得試；部分成本就比較高，可能要等適當「時機」。例如喇叭線的插頭，Antony 說自己偏好「叉插」，「因為叉插駁上去之後接觸面積大，變相擴音機驅動的電流通路較闊，自然更好聲。」蕉插就勝在方便，Antony 就話做 showroom、响外面設置場地，就鍾意用蕉插。夾線就不太建議，接觸面不大，又易有斷線等問題，「落錫」會好少少，不過都要面對氧化等問題。通常用家不需要玩到這麼複雜，買對好少少的插頭仲好。

另一個提升音質的方法就是 Bi-Amp，用兩組擴音機分別去驅動喇叭的高、低音，能量更大，控制會更好。不過除非無咩預算限制，否則一般用家都不會搞到咁「大陣仗」。Antony 就話：「其中一個轉玩 Bi-Amp 的好時機，就是剛好要升級擴音機，有多一部機剩，又唔想麻煩賣，就可以用來做額外 Amp 玩。」Bi-Wire 也是另一種較常用的進階駁法，由擴音機一個喇叭端子輸出，不過就分開兩條線駁落高低音，原理同叉插有少少似，都是令電流通路更闊，擴音機的驅動力可以完全傳遞到喇叭。不過用粗身線材有時都做到類似效果，所以未必人人會用。

線材價可佔三成　器材擺放要「離地」

其中一樣影響音效比較多的就是線材，「而家用家好聰明，知道貴線未必就等於好，要夾返喇叭至得。呢樣就真係要試，有一些線材比較『雜食』，配咩喇叭都有提升；某些就要配特定喇叭先有效果。」配得好的線材可以令聲音分離度更好，成個音場都更闊更立體，Antony 表示：「投資落線材的成本甚至佔喇叭價錢的三成都不為過，對 Hi-Fi 向的用家更加如此。當然實際幾多最好，都係要睇返用家預算。」

至於又玩影音，又兼聽歌的用家，Antony 覺得現時的擴音機好方便，按一個掣可以 by-pass 音樂訊號純聽歌。當然，如果比較重視音樂播放的話，一部專門推前置喇叭的額外擴音機會係幾好的投資。最後 Antony 都分享另外一些靚聲小 tips，「線材不要凌空吊住，易吸到 noise；擴音機最好擺地下，不過不要完全貼地，用釘腳之類稍稍抬起會更好聲。另外，要駁同樣的總距離的話，訊號線同喇叭線長的比例，喇叭線短、訊號線長，通常比起喇叭線長、訊號線短要好聲。這些都是細節，不過對音質有幫助，大家不妨一試。」

想瀏覽更多 SPILL 視聽專題，請即按 https://www.spill.hk/features/

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。