時鐘、鬧鐘、收音機、定時開關功能齊

大家對 Sonoro 這個品牌可能會有少少陌生，這是上年 11 月先至正式來港的德國品牌。Sonoro Stereo2 內置了 CD、收音機以及鬧鐘功能，可以收聽 FM 及 DAB+ 廣播，前面板的顯示屏可以顯示日期、時間。機身內置了兩組鬧鐘設定，用家可以自選內置的柔和音樂，又或者以電台、CD 音樂作為鈴聲。此外亦支援定時關機功能，可以一直聽歌直至入睡，都不怕喇叭會開到天光浪費電力。機身內置了電池，即使在斷開電源的情況下，依然可以提供時間顯示以及鬧鐘功能。作為床頭音響來說，基本功能相當齊全。機身設有 USB 端子，可以插手指播歌之外，也支援為 iPhone、Android 等手機充電。

2.1 聲道設計、支援藍牙 aptX

雖然貌似只有左右兩邊各有一隻單元，其實 Stereo2 是 2.1 設計，4 吋的超低音單元設於底部，而前面的則是兩組 3 吋全頻單元。所以 Stereo2 都有少少偏大，大約同普通微型音響類似，不過就矮身少少，床頭櫃都要有一定空間先至擺到。機身內置藍牙功能，相信也會是用家比較常用的播歌方式，支援較高音質的 aptX 傳輸。Sonoro 都有推出一款《Sonoro Music》App，用作收聽網絡電台、支援 Podcast、音樂播放等功能，不過就是通過藍牙連接，所以大家用返自己常用的聽歌 App 其實都一樣無問題。少少復古的外形，Stereo2 也是一款「賣樣」的喇叭，所以都提供了好豐富的機身顏色選擇，紅、亮黑、啞黑及木色都有。

音質測試：音場好闊、聽歌有現場 feel

不得不說 Stereo2 的聲音擴散性比預期中要好幾多，通常這類前置單元的一體式喇叭，音效覆蓋好多時好窄，稍為企邊少少音量就已經大打折扣。Stereo2 這方面做得幾好，企邊大約 45 度左右音效分別都不大，再側少少的話音量先開始稍為減弱。這對於擺床頭的音響來說幾緊要，擺位可以靈活好多。由於支援藍牙 aptX，聽歌音質同 CD 幾接近，後者分析力好少少，不過差別不太大。

人聲結像幾清晰，有少許箱聲，不過未至於太明顯。下置式的低音單元對音效幫助幾大，令到整個音場變得相當闊，以一隻兩組前置單元擺得這麼近的喇叭來說，可以做到這樣的效果實在幾難得。聽流行音樂都會有少少現場聽 Live 的感覺，缺點是有少少回音感、優點則是氣氛同音樂感都幾好。低頻量感好足夠，幾有彈性，而且延伸幾好，係分析力不算極高，不過以小型音響而言收貨有餘。

總結：擺床頭聽 Live

作為床頭或者枱頭音響，Sonoro Stereo2 的基本功能幾齊全，時鐘、鬧鐘、收音機、CD 同藍牙都有齊。音場幾闊，聲音幾有現場感，對於喜歡高還原度音樂的用家未必鍾意，不過對大部分用家來說這種聲音取向相信都幾討好。以一體式音響來說售價稍稍偏貴，不過 Stereo2 除了「賣聲」之外，明顯也是「賣樣」，復古混合現代的設計，加上顏色選擇亦都相當多，今次借到手測試的木色款質感相當好，作為家居裝飾也毫不失禮。

Sonoro Stereo2

售價：$6,480
查詢：大昌影音（2262 1173）

同場加映

縮細版 Sonoro CD2 繼續復古多色

保留主要功能和規格

Sonoro 同廠還有另一款 CD2 微型音響，外形上就好似 Stereo2 但移除了左、右兩邊的喇叭，機身更加小巧，不過就保留了大部分功能，包括電台、藍牙、CD 機、USB 充電等等。機身改用了 3 吋單元、低音反射式設計。一樣有紅、黑、木色選擇，不過就多了灰色機身選擇，繼續復古設計，細機身就更容易讓空間有限的用家擺放。

Sonoro CD2

售價：$3,680
查詢：大昌影音（2262 1173）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。