follow us
4K 電視愈來愈普及，加上近年 HDR 技術的加持，令到電視可以呈現的畫質比起 Full HD 年代好上不止一個層次。不過好的硬件都要有適當的調校先至可以獲得最好的效果，我們今次就找來 AV Life 銅鑼灣店的助理店長 Derek Yiu 同大家分享一下 4K 電視的調校要點，究竟 4K TV 同 FHD 電視校畫面的方法是否有不同？HDR 畫面又要點處理？平時每日都要操作示範幾十款不同牌子、型號的電視，經驗豐富的 Derek 仲會分享一下在舖頭點樣揀選適合的電視，以及在家居如何 5 分鐘快靚正地設定好畫面。
究竟而家 4K 電視有幾普及？Derek 都話現時客人已經多數是選購 4K TV。除了畫面靚之外，更大的原因是新機選擇多，而且價錢同早幾年的全高清機款已經相差不遠。「而家新型號除了部分細尺寸仍是 Full HD，中、大尺寸基本上已經是 4K 佔大多數，而且入門機價錢都好大眾化，所以買 4K 大家會覺得更划算。」不過解像度提升之外，畫面調校方面又有沒有甚麼不同？Derek 就話如果單是 4K 其實調校方面大部分同之前差不多，反而是 HDR 會比較難搞。「好多用家買機返屋企都係選擇 Standard Mode 就算，其實這個『標準』畫面模式都可以應付到大部分睇電視的需要，不過如果睇戲、煲劇多的話，自然、電影或者劇院這類模式會更適合。」不過 Derek 都話，對畫質有要求的用家，預設模式未必完全滿足到，「可以用電影、劇院等模式的設定做參考，再調節出理想的畫面。」
雖然叫「亮度」，實際上是調校畫面黑位，數值太低暗位會黐地、變成一撻撻；數值太高畫面黑位就會變灰，對比度好差。調校的時候可以用一些較暗的畫面同場景去輔助設定，由低校起，到暗位有足夠細節同層次就剛剛好。
用來調節光位，新一代電視基本上預設對比度都幾足夠，可以用一些比較光的場景去輔助調校，一直調高到光位開始失去層次，再調返低到層次出返來就 OK。（部分機款校高到最盡光位都未必會「爆」，這時調節到有適當的光度就可以。）
<電視面板的背光亮度，要視乎大家睇電視現場環境有幾光，再來調節。如果客廳近露台，或者現場光比較光的話，可以將背光相應調高；如果平時用電視可以拉簾，調低客廳、房間光度的話，就可以相應調低背光。光度望落舒服，不要太刺眼，也不要太暗睇得辛苦就可以。
設定電視畫面的「白色」，通常睇電視節目的話，標準/中性/中性偏暖的白平衡設定就適合。而睇戲的話，通常暖色調會較適合。每間廠提供可以選擇的設定項目都不相同，不過播套戲稍為試一試就可以選到。
設定畫面有幾「銳利」，雖然調高數值貌似畫面細節會多了，不過太高反而會影響了畫面解像力，一些邊位、線條會「起白邊」。現時 4K 解像度已經好高，Sharpness 只需要稍稍調高效果就已經好好。
新一代電視都有不少畫面增強的設定，Derek 就話要慎用：「有時自動背光、自動對比等設定由於會受現場光影響，令畫面的效果會轉來轉去，未必人人適應。動態對比、黑位增強等設定可以試下由『低』設定試起，如果覺得效果太誇張、睇落眼好攰、或者光暗位細節無晒，就建議關閉返。」不過都有一些設定，Derek 是建議要用的：「例如『Noise Reduction』降噪功能可以減少雜訊，令畫面更加通透立體；『Motionflow』等動態補償功能都可以適當開少少，令畫面更流暢。不過開太高會令電影畫面變得不自然，呢樣要留意。」另外，Derek 都提醒大家：「畫面比例有時設定做 16:9 都未必足夠，如果有得揀點對點 / 全像素的話，記得揀返。因為 16:9 都有機會因為 Over Scan 而裁走了周圍的一些畫面。」
至於 HDR 的調校，Derek 都話比較麻煩，「因為 HDR 的效果太強，但現時可以做參考調校的素材不多，標準亦都有少少混亂。所以比較好的做法，是先選擇一個較為適合的預設 HDR 模式，然後再微調效果，比較常見例如 HDR 的光位太刺眼，可以稍為將對比度調低。較大幅的調整好易令到 HDR 畫面變得不自然，所以通常微調就好。」不過 Derek 都提到：「好多電視的 HDR 模式其實大部分設定都『鎖死』了，用家可以調校的參數並不多，所以唯有選一個覺得效果最好的 HDR 模式就可以。」
至於落舖揀電視，點樣先至比較容易揀到畫質啱心水的機款？「唔少朋友都知，舖頭的電視通常會用一個『店舖展示』的畫面模式，亮度高、對比大、顏色鮮，務求吸引顧客視線。不過大家日常使用的話，這種畫面睇一陣就會攰。所以落舖睇中某個款，想睇吓畫質係咪自己杯茶，可以叫店員幫手轉下標準、電影、影院之類的畫面模式，睇吓大概效果。」除了畫質之外，Derek 就話價錢、功能、甚至外形都係大家最常見買電視的考慮因素。「例如最近 LG 推出的『牆紙』電視 W7 系列，因為外形夠吸引，所以都有不少客人有興趣。」不過這麼多個因素當中，最重要的還是尺寸，「最多人客首先考慮的是電視尺寸，畢竟要擺得落、或者足夠用，先至再考慮價錢、功能。」
請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。
