「換季」時間升級折扣優惠多

每年春、秋兩季通常都會有電視機款的更新，尤其 4 月到 6 月之間、每年的第一次「大換血」新機特別多。這時通常舊款機清貨，減價會減得特別勁、優惠同贈品亦都特別多，可以話係換機的最佳時機。不過就要留意，通常貨尾剩低數量都不會太多，早少少去電視舖格下價先有比較多選擇。如果想要新功能的話，新一代機款相當大部分亦已經在這個時間發售，所以同樣是升級好時機。不過今年款比起上年款，同一尺寸、等級之下通常都會貴 20% - 40% 不等，大家就記得要了解下新功能或者新規格自己係咪有需要再做選擇。不過好彩 4K 電視愈賣愈平，一萬蚊樓下就算最新款都有不少選擇。

$5,000 有 50 吋？　上代入門機夠抵玩

五千蚊早年可能連大牌子的 Full HD 電視選擇都不太多，幾年前開始有平價 4K 電視推出，不過 40 吋型號都要七至八千蚊。估唔到而家 $5K 預算就已經可以買到 4K 電視，而且仲有 49 吋型號揀！講緊就係 LG 49UH6100，雖然是上年的型號，不過就擁有 49 吋畫面，對好多家居來說這個尺寸已經幾夠用。除了 3,840×2,160 的 4K 解像度，仲已經支援埋 HDR10，播 UHD Blu-ray 都可以睇到 HDR 效果。雖然就並未支援更高階的 Dolby Vision，不過反正現時支援 Dolby Vision 的內容並不算多，有 HDR10 都幾足夠。另外，UH6100 已經行緊 webOS 3.0，LG App Store 都有不少電視 App 可以裝，Netflix、YouTube 等等都當然都有，相當抵玩。

$7,000 - $8,000 有入門大畫面或者中階 Dolby Vision 機款揀

五、六千蚊價位主要是入門機，去到七、八千蚊就已經有中階機，或者較大尺寸的入門系列揀。其實上年和今年的 4K 電視在規格上差別並不算十分大，中階機功能可能強一點，例如多了 Dolby Vision、更高的畫面更新率和流暢度等等。在硬件方面，上年開始流行「量子點」面板，通常也要到中高階機款先至配備。至於入門的大畫面選擇都有不少，例如 Samsung UA55KU6900，55 吋弧形 4K 系列，有 SmartHub 介面易用、亦有大量 App 玩。中階機的話，LG 49UH8500 也是不錯的選擇，支援 Dolby Vision、IPS 4K 量子點屏幕，同樣行 webOS 3.0 支援擴充功能。今年款的話，$7k - 8k 價位就要低一級 UJ7500 的 43 和 49 吋型號。

$10,000 價位 2017 機款選擇多

買機預算去到 $10k 的話，其實選擇就已經相當多，由上年的大尺寸中階機、到今年的中尺寸中階機都有得揀，而且新機選擇都幾多。例如 Sony KD-49X8000E、Panasonic TH-49EX680H、LG 49UJ7500 等都是一萬蚊左右，不過就已經是剛剛推出不久的新機，全部都對應 4K、HDR，有齊 Smart TV 功能，而且剛好也全部都是 49 吋。想要再大少少？今年 LG 的 55UJ6300、55UJ6500，Panasonic 的 TH-55EX600H 都是 55 吋新機，不過就偏向入門型號，並未支援 Dolby Vision 等新功能。大牌子 60 吋或以上就要撞手神大減價先至有，或者預多少少 budget 先至揀到。

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。