「HDR」令畫面都可以好「Hi-Fi」？

近年影相好流行「HDR」（High Dynamic Range，高動態範圍）效果，電視的 HDR 其實有少少類似，都係講緊在畫面上，重現現實環境見到的高光同暗位，令畫面更像真。不過影相的話，以現時主流的 8bit JPEG 為例，只可以顯示 256 級由全黑到全白的灰階，實景的最光同最暗位都要「壓縮」到呢 256 級光度入面。HDR TV 就唔同，最少都支援 10bit 處理，擁有 1,024 級的灰階。除了光暗顯示更加細緻之外，可處理顏色亦由 8bit 的 1,670 萬色變成 10bit 的 10.7 億種顏色，支援的亮度亦更高，超過 1,000nits（現時大部分電視普遍為 400nits），令電視畫面可以還原到更接近實景。音響追求「Hi-Fi」（High Fidelity、高保真），而家 HDR 令到畫面都可以好「Hi-Fi」。

HDR 不止面板還有處理器及解碼

照咁講 HDR TV 貌似只是對比度很高、灰階很細緻的電視，以往的高階電視，例如直下式 LED TV 或者 OLED TV 可能都做到同樣的效果。但事實上並「唔可能」，因為以往的動態範圍的「樽頸位」在片源，受限於長年使用 Full HD 的 8bit 色深、Rec.709 色域的標準，動態同色域都較窄。現時 HDR 影片採用的是 10bit 色深、採用更廣闊的 Rec.2020 色域，電視本身要支援新一代 HEVC 影片裡的 HDR 解碼先至可以顯示 HDR 效果，所以舊電視即使 panel（顯示面板）超靚都好，但係處理器、軟件不支援解碼播放的話，依然「無用武之地」。

HDR 的 4 個主要標準

現時 HDR 的主要標準有 4 種，包括 HDR10、Dolby Vision、Technicolor/Philips HDR 及 BBC HDR。當中 HDR10 及 Dolby Vision 算是最為普及，前者是開放的標準平台，被 Blu-ray Disc Association（BDA）採納應用於 UHD Blu-ray 之上；後者則是 Dolby 研發多年的技術，連 Dolby Cinema 都有應用到。所以主流的片源，包括影碟同串流基本上都係用以上兩個標準，電視兼容就可以播到。

兩大 HDR 陣營

HDR10：開放平台、應用於 UHD Blu-ray 之上，採用 10bit 色深及 Rec.2020 色域，SMPTE 2084 EOTF 的灰階標準（類似以往的 Gamma 2.2 的新一代規格，用於 HDR），最高亮度要求為 1,000nits。20 世紀霍氏、Amazon Instant 同 Netflix 等都有採用這個標準的影片。

Dolby Vision：由 Dolby Labs 開發的技術標準，要求比 HDR10 更高，可以支援 12bit 色深、最高亮度可達 10,000nits（作為參考，陽光普照時的天空為 30,000nits）。不過現時其實並無硬件可以重現這個最高標準，大多數製作仍為 10bit、顯示器最高亮度亦只有 4,000nits。華納兄弟、Sony Pictures 以及 Netflix 都有採用 Dolby Vision 作為影片標準。

咁而家有咩影片有 HDR？

「講完咁耐，究竟而家有咩片有得睇 HDR？」現時支援 HDR 的 片源主要有兩個，一個是 UHD Blu-ray，在歐美等地已經開始發售，相信在今年稍後亦會正式進入本港市場；另一個片源是網絡串流，Amazon Instant、VUDU 等香港就無得睇，不過香港版的 Netflix 亦已經有 HDR 影片串流，LG 最新在港推出的 UH9500、UH9400 等 UHD TV 都會支援，不過就要等等 Firmware 升級。

睇 HDR 需要咩器材？

如果小編答「電視」的話，大家不要覺得是廢話，因為如果以串流方式睇 4K HDR 影片，的確只需要一部支援的電視。香港這方面的選擇較少，在可見的未來都係暫時得 Netflix，LG、Sony 等大品牌的 4K HDR 電視基本上都支援，不過可能要等一等 Firmware 升級。至於 UHD Blu-ray 就額外需要一部 UHD Blu-ray 播放機，例如 Panasonic DMP-UB900、Samsung UBD-K8500，歐美和日本等地都開始有售，香港應該都就快。

緊貼最新資訊，請讚好 SPILL Facebook 專頁。