follow us
「UHD Blu-ray」是現時最新的影碟格式，可說是 Blu-ray 影碟的「進化版」，擁有更高的解像度、更好的聲畫質素。雖然暫時香港仍未有行貨的 UHD Blu-ray 影碟同播放機，不過相信今年內大家就有得玩，因為歐美、日本等地年初已經陸續推出。一直覺得買了 4K 電視但係冇 4K 片睇？UHD Blu-ray 將會成為 4K 電視的「最佳拍檔」，提供現時最好的聲畫享受。
只可以話現時的 UHD Blu-ray 就係「4K Blu-ray」，「咁點解唔用 4K Blu-ray 呢個簡單直接易明嘅名？」因為由 Blu-ray Disc Association（BDA）訂立的 UHD Blu-ray 規格其實支援 4K 或以上的解像度，即係話而家係「4K」，第時可以有「6K」、「8K」甚至更高解像度，學張家輝話齋「而家冇，但係將來會有。」因為唔想個名限死了規格，將來「4K Blu-ray」出「8K」解像度咪尷尬？
可能會有人以為 UHD Blu-ray 就係講緊擁有 3,840 x 2,160 4K 解像度的 Blu-ray，其實由 Blu-ray「進化」到 UHD Blu-ray 並不止係解像度的 4 倍提升，後者仲會支援近排好熱門的 HDR 技術。冇錯！大家可能都留意到最近推出的 4K 電視好多都支援 HDR，可以令畫面對比更強、更立體、光暗位層次更豐富。另外，UHD Blu-ray 亦會採用比現時 Blu-ray 的 BT.709 闊接近一倍的 BT.2020 色域以及 10-bit 的色深，可以顯示更加豐富的色彩，顏色還原可以更像真、畫面質感亦會更好。
延伸閱讀：
相比起畫質方面的大提升，UHD Blu-ray 在聲效方面其實同現時的 Blu-ray 差不多。不過由於一開始就是為新一代的聲畫體驗而設，所以原生就已經支援 Dolby Atmos 同 DTS:X 兩款最新的 3D 環繞聲。不過支援還支援，影碟未必一定有呢兩隻聲軌，有可能淨係得 Dolby TrueHD 同 DTS-HD，所以買碟的時候記得要睇清楚。
不過暫時 UHD Blu-ray 播放機同影碟都只係得水貨，但係因為影碟已經取消了地區限制，所以想玩其實可以即刻買來玩。播放機就上年年尾開始在日本推出，今年初在歐美地區發售，選擇有限，暫時只得 Panaosnic DMP-UB900、Samsung UBD-K8500 兩部，售價分別約為港幣 $6,500 同 $3,000 ，比起普通 Blu-ray 機略貴，不過仍算可接受範圍。
2018 年 9 月 14 日更新：
繼經典的 BDP-LX91、 BDP-LX88 之後，在 UHD 年代 Pioneer 終於也推出了 UDP-LX500 這款發燒級 UHD Blu-ray 宇宙盤。 |
影碟在 2016 年 3 月初在美國大批推出，好多新戲，例如《火星任務》、《蜘蛛俠》、《皇家特攻》等都已經有，售價大約係港幣 $200 至 $300 之間，都係比普通 Blu-ray 略貴。至於香港行貨幾時有？暫時筆者真係答唔到大家，相信今年年中、最遲年尾會有吧。
其實情況同而家播 Blu-ray 類似，需要 UHD Blu-ray 影碟配合 UHD Blu-ray 播放機就可以睇到。而家普通的 Blu-ray 播放機係「睇唔到」UHD Blu-ray 的，不過掉返轉 UHD Blu-ray 機就可以睇返普通 Blu-ray 碟。電視有冇要求？有 4K、HDR 當然最好，不過就算只係全高清電視，依然可以在 UHD Blu-ray 機上調節輸出、校低解像度支援。中間想駁部 AV 擴音機，又想享受到 UHD Blu-ray 的「原汁原味」的話，就要留意有冇支援 HDCP2.2 同 HDMI 2.0/2.0a 規格，不過並唔算特別高要求，新一代入門擴音機基本上都有。
緊貼最新資訊，請讚好 SPILL Facebook 專頁。
