follow us
「DTS」的名號大家實聽過，「DTS:X」呢個格式就未必咁熟。其實 DTS:X 同戲院或者而家家用的 Dolby Atmos 相似，都可以為大家帶來水平的環繞聲以外，加上由天花而來的全方位包圍音效，睇戲時可以更加感受到身臨其境的震撼。講到咁「神奇」，別以為 DTS:X 要好貴的器材先做到，其實只需要一部支援 DTS:X 的入門擴音機，再比平時 5.1 加多對喇叭就得。究竟 DTS:X 呢個格式有甚麼特別？邊啲 Blu-ray 已經有呢款音效？最平用咩器材可以玩到？以下就同大家一一介紹。
DTS:X 上年 4 月公佈，是 DTS 繼 DTS-HD MA 之後的新一代環繞聲格式。DTS-HD MA 已經廣泛應用到 Blu-ray 上作為主流的「高清」環繞音效，同 Dolby TrueHD 分庭抗禮，通常係「一半碟係你、一半碟係我」。DTS:X 就起步較遲，比起家用版 Dolby Atmos 公佈遲了大半年，咪睇少呢一年半年，Dolby Atmos 已經「食」了唔少市場。現時好多影碟同 AV 擴音機已經支援 Dolby Atmos，但 DTS:X 仍是相當少。今年開始多擴音機更新 firmware 升級，亦都有 DTS:X Blu-ray 影碟推出，可以話 DTS:X 開始進入急起直追階段。
同以前人聲一條聲軌中置喇叭出、其他喇叭每個一條聲軌不同，DTS:X 同 Dolby Atmos 一樣都是「Object-based」音效，類似以前讀書「Vector」的概念。有粒子彈飛過，聲軌資料上有它的音量、音質同方向資訊，至於邊一隻喇叭負責出聲，就由擴音機的處理器分析後再分配。好處是喇叭擺位經過系統計算，令到聲音定位可以更準確，配合新加入的天花喇叭，令到整個音場包圍感更加好、更像真，所以 DTS:X 的中文名先叫做「臨景音」。
DTS:X 環繞格式特點：
DTS:X 號稱擁有最為靈活的喇叭擺位，任擺都可以營造出 3D 環繞聲效。實際上當然「無咁神奇」，DTS:X 家用版都有幾個標準擺位方式，5.1.2、7.1.2 等等，同 Dolby Atmos 都幾類似，所以有用開或者打算用 Dolby Atmos 系統的朋友唔使太煩惱，兩者可以互相兼容。至於詳細的擺位可以參考以下圖表。比較特別的是 DTS:X 的天花喇叭除了有垂直面向地下的擺放角度之外，還有斜向中間位的角度。
要玩到 DTS:X 音效，最基本要有支援的 AV 擴音機同埋 5.1.2 喇叭。其實上年推出的入門擴音機唔少都會支援 DTS:X，例如 Onkyo TX-NR646、Denon AVR-X1200W 等，不過暫時都仲未有 firmware 升級，可能要今年稍後的時間先有。高階機就相對有著數，Denon AVR-X7200W 今年年初就已經有得升級支援 DTS:X，Yamaha 高階的 AVENTAGE 系列幾部機款亦剛剛有得更新，Onkyo 同 Pioneer 的 DTS:X firmware 升級就預計在今年 9 月推出。
已經支援 DTS:X 的 AV 擴音機（截至 21/4/2016）
Denon
Marantz
Yamaha
註：「XX 聲道處理」即可連接額外後級擴展音效，e.g.「7.2 聲道 AV Amp、9.2 聲道處理」即擴音機本身可直接駁喇叭輸出 7.2 聲道，加上額外兩聲道後級就可以獲得 9.2 聲道輸出。
有齊支援的擴音機同環繞喇叭都仲未夠，要玩到 DTS:X 都仲要有碟可以播。有別於 Dolby Atmos 有大量的影院同電影作後盾，令 Blu-ray 加入 Dolby Atmos 音軌變得相對容易。DTS:X 由於起步較遲，現時配備了 DTS:X 音軌的 Blu-ray 數量仍是較少。第一隻支援 DTS:X 的影碟是《Ex Machina》，其後則有《American Ultra》，以及音效相當正的恐怖片《Crimson Peak》，好適合用來試機。
最新的 DTS:X Blu-ray 則有《葉問 3》同《西遊記之孫悟空三打白骨精》，兩部都是由香港的嘉輝製作有限公司負責混音及製作，後者更是首隻擁有 DTS Headphone:X 聲軌的華語 Blu-ray，香港在這方面都可算是幾「威」。無錯，DTS:X 音效可以應用到耳機之上，當然，用只有兩聲道的耳機來聽效果一定及不上環繞喇叭，不過可以通過普通耳機就模擬出一定的環繞聲效果，對打入遊戲、手提播放（特別是手機播放睇片）的市場有相當大的幫助。
緊貼最新資訊，請讚好 SPILL Facebook 專頁。
