上一篇同大家介紹了今年推出的新一代電視的新功能，當中又有沒有甚麼功能吸引到你？除了功能之外，其實選購 4K 電視還有不少需要注意的地方，我們就找來影音專家、AV Consultant 的負責人 Alan Lee 同大家分享一下，究竟而家買 4K 電視有甚麼地方需要留意、有咩規格同功能一定要有？接駁同安裝有時會遇到甚麼問題、點先可以避免？這些疑難都會同大家一一分享。
近幾年 4K 電視已經愈來愈普及，今次就帶大家了解一下現時 4K 電視的發展、市面上的新機有甚麼功能以及要注意的規格，還有入門或者升級用家選購時要留意的地方，等大家可以更容易挑選到適合自己的 4K 電視。
上一篇同大家介紹了今年推出的新一代電視的新功能，當中又有沒有甚麼功能吸引到你？除了功能之外，其實選購 4K 電視還有不少需要注意的地方，我們就找來影音專家、AV Consultant 的負責人 Alan Lee 同大家分享一下，究竟而家買 4K 電視有甚麼地方需要留意、有咩規格同功能一定要有？接駁同安裝有時會遇到甚麼問題、點先可以避免？這些疑難都會同大家一一分享。
對於仍未升級 4K、又預算有限的朋友來說，最大的問題可能就是：現在還買 Full HD 電視嗎？還是 4K 會好一點？Alan 的意見好直接，就是選 4K TV 比較好。「因為而家 4K 同 Full HD 電視的價錢差唔遠，即使係睇全高清內容，4K TV 配合內置的處理器，通常畫面點都會再清晰一點。」不過 Alan 都補充，如果預算真係好有限的話，都有機會買 Full HD 中階舊機、畫質比起 4K 入門機好一點，不過就要花時間去搵同去比較。
可能不少朋友揀電視都係「有大買大」，budget 許可的話都會買大一點。Alan 都話正常都會這樣揀：「因為電視畫面大一點，睇戲睇電視都會無咁攰、會舒服一點，當然大畫面睇戲都震撼一點。」不過 ，同 4K VS Full HD 的情況類似，如果在有限 budget 之下，尺寸同畫質、功能可能就要平衡一下，「同樣價錢之下有機會買到尺寸細一點，但畫質同功能強一點的機款。」
講到市面上平價同貴價的 4K 電視，Alan 就話主要差別在於尺寸、面板（例如 OLED、QLED、LED 等）、圖像處理器、功能等等，價錢貴一點、規格同功能通常好一點。「如果講到有咩係新一代電視一定要好、對用家好重要的話，我自己覺得就係 HDR 同埋網絡功能。」Alan 接著解釋：「HDR 對畫質提升好大，至於各種網絡功能，除了 Netflix、Amazon Video 等可以提供到 4K 內容之外，仲可以利用電視內置播放器睇 NAS 內的影片，用落會方便好多。」
至於畫質方面，Alan 就話普通用家想判斷畫質，一個比較好的方法就係「睇新聞」。「因為大家都比較常見到新聞、財經報導的畫面，對人面膚色、色彩濃淡、畫面細緻度等都有一定的印象，會比較容易在不同的電視上面區分到畫質的差別。」至於新聞畫面下面的走馬燈字都好有助判斷畫面效果，如果出現唔順暢、窒格好嚴重的話，就證明影像處理表現一般。「因為動態畫面其實比較容易睇得出瑕疵，影像處理能力的高下亦都較為容易判斷。至於黑位就可以睇畫面最暗的位置，睇吓係咪滿意，亦都可以留意牆身、藍天等同一隻顏色、但又有漸變的畫面，睇吓有冇色彩斷層的出現，這些都是較為容易睇得出分別的地方。」
對於近期好熱門的 4K OLED 電視，Alan 就話如果 budget 足夠的話當然是現時最好的選擇，畫質方面，尤其是黑位、對比度、可視角度等等比起 LED TV 都有相當優勢。缺點是有機會出現「burn in」的情況，使用壽命上通常及不上 LED TV，所以比較適合影音發燒友或者對畫質有好高要求的用家。「雖然 OLED 電視已經便宜了不少，不過依然比較貴，普通用家如果買部電視想長用的話 4K LED TV 依然係好選擇，尤其近年 LED TV 的畫質都不斷提升。另外，如果使用的環境如果比較光亮的話，LED TV 通常有較高的亮度輸出，亦都可以應付到。」
至於安裝方面，Alan 就話通常座檯安裝都問題不大，「掛牆就要比較小心，尤其近年電視愈出愈薄，一唔小心有機會扭螺絲扭爆面板，就算只係扭到有輕微變形，長期使用之下都好大機會出問題。」另外，電視接駁方面，Alan 就提醒：「部分電視未必每個 HDMI 都支援 4K HDR，接駁的時候要留意返。另外線材都有影響，尤其是兩、三米以上的長線，要睇吓係咪真 18Gbps，足夠傳輸到 4K HDR 的畫面數據，因為線材不兼容未必立即睇得出來，有時係過到 4K 過不到 HDR，有時係換機先出問題無畫面等等，想穩陣一點的話可以選擇有 18Gbps 認證的線材，會比較有保證。」
| 1. OLED vs. LCD
OLED TV 技術開始成熟，而且擁有極為出色的畫質，不過價錢仍然偏貴；LCD/LED 技術更成熟，尺寸、價位的選擇更豐富，使用壽命理論上更長。 |
| 2. 支援影像：4K HDR
比起開始 fade out 的全高清電視，更推薦 4K 電視；HDR 也是比較重要的規格，尤其近一兩年入門機都開始支援，所以新一代機款有優勢。 |
| 3. 進階 HDR：Dolby Vision 和 HDR 10+ 要二揀一
通常最基本支援 HDR10，大部分會有埋 HLG 方便部分廣播的 HDR 內容；至於 Dolby Vision 同 HDR10+ 就暫時係二揀一，Dolby Vision 內容暫時較多，不過 HDR10+ 兼容 HDR10，有機會後來居上。 |
| 4. 進階畫面功能：畫面模式及調校
雖然好多時畫面增強功能係「無好過有、關好過開」，不過部分功能依然幾實用，例如一些 isf、Technicolor 模式，以及更深入的畫面調校功能，等進階用家可以更方便調校出心水畫面。 |
| 5. 不同的電視操控體驗
現時幾個主流品牌都採用了不同的電視系統，例如 Sony 的 Android TV、Panasonic 的 Firefox、LG webOS 以及 Samsung Tizen 等等，各自有不同的介面及操控設計。 |
| 6. 多媒體功能：串流及本地播放
網絡及多媒體功能方面，主要的串流、影視等功能差別不大，多數新機都已經支援 Netflix、Amazon Video 等平台，亦都支援 NAS 及 USB 連接的影片、音樂及相片等媒體檔案播放。 |
| 7. 機身接駁：HDMI 數量及規格、其他端子
入門機有可能只有 3 組 HDMI，中階至高階機款多數都有 4 組，留意是否全部支援 4K/60p、HDR 的影像輸入，要接駁其他舊有器材的話就要留意埋有無色差、RCA 等端子，是否需要轉插等。 |
| 8. 擺法及尺寸：座檯 vs. 掛牆
部分高階機款只支援掛牆，部分新機就有新設計的掛牆架。座檯擺放的話就要留意機身同座檯架的尺寸是否擺得落，特別左右兩邊腳架的機款有機會比起電視本身仲要闊。 |
| 9. 其他要求：曲面、3D 等等
想試吓曲面電視的話，建議至少要選擇 65 吋或以上的大畫面先至比較有包圍感的效果。3D 現時好多電視都已經不支援，買之前要留意規格或者問清楚。至於遙控作為滑鼠（LG 高階機配備）、安裝 APK（Sony Android TV 支援）等都可以通過配件、Media Player 等加入。 |
SPILL Paper 電子通訊，為你送上電郵限定的精選新聞，以及不同欄目的深度報導，評測、觀點、專題，包羅萬有。立即按此訂閱。
