【HKAVPE 2018】新產品低調亮相

2018年06月09日

今屆香港影音博覽暨流動音響展（簡稱：HKAVPE）在紅雨之下開始首日展覽，不過狂風暴雨似乎都無阻大家的熱情，阿熾 10 點半去到拍攝開幕禮的時候已經見到有唔少朋友排隊等入場，之後各大試音房好快已經坐滿人。今次 HKAVPE 都有不少最新推出的影音產品示範，另外都有部分新品係首次亮相，不過就比較低調無得即場試聽試睇，大家在現場又搵唔搵到這些「未登場」的新產品？

今屆香港影音博覽暨流動音響展（簡稱：HKAVPE）在紅雨之下開始首日展覽，不過狂風暴雨似乎都無阻大家的熱情，10 點半去到開幕禮時已經有唔少朋友排隊等入場。

主力四場區　影音示範繼續受歡迎

今屆 HKAVPE 繼續在尖東舉辦，主要的 4 個場區有富豪九龍酒店的 2、3 樓以及隔離帝苑酒店的 2 樓及地庫 1 樓。影音示範集中在帝苑地庫，有 Sound United 帶來的 Marantz AV8805，以 7.1.4 聲道、6 隻超低音示範；另外隔離仲有 HiVi 的多款 Acer 4K 同 Full HD 投影機示範，配以 9.1 聲道（5.1 + 前後方高置）的 Auro-3D 聲效。至於音響示範就分散在其他 3 個場區，包括威達、Sound Concepts、KEF、方浪、Cambridge Audio、米樂等等。帝苑的展房數量少一點，不過大會的 CD 換領處設於帝苑二樓，大家記得拎 CD 同埋到地庫睇吓超正的家庭影院示範。

人才濟濟的開幕禮。

風雨無阻，未開場就已經有好多朋友排隊等緊入場。

OPPO 的 UHD Blu-ray 機同解碼器等器材買少見少，今次就算來會場，部分機款都只能預訂，大家要把握機會了。

今次行場阿熾係先去買碟 shopping 一下，得利繼續有買碟優惠，而且多買多送，另外鍾意 DC 電影的朋友，買碟仲有 figure 送。

CD 區同樣人頭湧湧，一開場已經有唔少朋友衝過來掃貨。

阿熾都知道影音示範一定多人，所以都第一時間衝去帝苑地庫試聽先，Marantz AV8805 以 7.1.4 聲道、6 隻超低音配合 Epson EH-LS100 短投，效果幾好。

隔離就有 HEOS Soundbar 配合無線後置，簡約方便玩到環繞聲效。

同樣係帝苑地庫位置的 HiVi 則有 Acer 幾款最新的 4K 投影機示範。

入面的影音房就有 Acer VL7860 加上 ATC 的 Home Theater 系列喇叭以 9.1 Auro-3D 環繞聲示範。

方浪音響今次就主力試 Estelon 喇叭，Devialet Phantom 都係擺隔離展示。

KEF 就有專人講解音樂串流的各方面設定，主力當然係試 LS50 Wireless。

威達就主力試 Rega RP 10 唱盤，配合 PS20 後級同 Magico A3 喇叭出聲。

新產品首次亮相

今次會場內當然都有唔少新產品示範，包括 Cambridge Audio 最新推出的旗艦 Edge 系列，配以 B&W 800 喇叭，好彩阿熾一早到場影了相，後來聽朋友講長期逼爆，可能影相都要排隊；另外仲有米樂新引入的 nakymatone 入牆式喇叭示範，低頻幾有驚喜；三樓會場大堂位置有 LG 2018 年最新系列 4K OLED 電視，隔離就有 Polk Audio 用小型 Soundbar 示範打機音效，行過的朋友可以去打吓機、relax 吓。另外都有部分新產品低調亮相，包括在 AV Hospital 可以見到 Pioneer 最新的中階型號、9.2 聲道的 VSX-LX503；帝苑地庫 Sound United 展區的 Denon 7.2 聲道入門機 AVR-X2500H、Marantz 7.1 聲道薄身系列的 NR1609，不過幾款新機都無開聲示範，大家又有冇留意到？

富豪 3 樓會場大堂就可以見到 LG 最新的 4K OLED 電視，包括最新的第二代牆紙系列 W8，可惜今次好似無靚女 promoter 在場。

隔離 Polk Audio 用小型 Soundbar 做打機示範，聲效都幾正，最重要係有靚女陪大家一齊玩（特定時間出現）。

Cambridge Audio 有最新的 Edge 系列示範。

米樂影音就有新引入的 nakymatone 入牆式喇叭示範，價錢由萬六蚊到二萬六千左右，低頻效果幾有驚喜。

AV Hospital 就繼續有 XAVIAN 喇叭以及 soulines 等一系列產品的示範。

院長當然都有一系列配件以會場優惠價益返各位到場的朋友。

另外，在 AV Hospital 都可以見到 Pioneer 最新的中階型號、9.2 聲道的 VSX-LX503。

「低調現身」的仲有 Denon 7.2 聲道入門機 AVR-X2500H 同 Marantz 7.1 聲道薄身系列的 NR1609，雖然現場無示範，不過應該好快就正式發售。

《2018 香港影音博覽暨流動音響展》

舉辦日期	2018 年 6 月 8 日至 10 日（星期五、六、日）
開放時間	11:00am - 8:00pm（Fri）/ 10:00am - 8:00pm（Sat）/ 10:00am - 6:00pm（Sun）
地點	富豪九龍酒店 2、3 樓（九龍尖沙咀麼地道 71 號）/ 帝苑酒店 2 樓、地庫 1 樓（九龍尖沙咀麼地道 69 號）
展覽規模	20 間「獨立展房」、10 個「軟件附件銷售區」、12 個「流動音響銷售區」
票價	港幣 60 元正

入場人士可獲得：

• 入場證乙張（只限當天使用）
• 發燒工具測試 CD《音響羅盤》乙張
• HKAVPE 2018 紀念場刊（限量印行，送完即止）或 HKAVPE 2018 標準場刊