收費 Now TV 有 4K HLG 免費 ViuTV 全高清直播
上屆 2014 年巴西世界盃其實已經實行過 4K 拍攝,不過香港並沒有進行電視的 4K 直播。今次俄羅斯世界盃香港觀眾終於有機會睇到 4K 世界盃。獲得直播權的 Now TV 會以 3,840 × 2,160 的 4K 解像度直播全部 64 場賽事,而且還提供了 HLG 這款 HDR 格式廣播,連之後的點播重溫都一樣有 4K HDR 揀。現有 Now TV 用戶可以直接以 $880 購買 2018 FIFA 世界盃通行證,不過要升級到 4K 通行證就要再多付 $200(即總數 $1,080)。用戶亦都可以選擇重新簽 24 個月約,選擇指定「推介之選」頻道組合就可以優惠價 $280 購買 2018 FIFA 世界盃通行證,升級 4K 通行證則同樣要額外 $200(總數 $480),不過就會獲贈 FOX+ 6 個月試睇,同埋有 2018 FIFA 世界盃限定禮品。
至於免費電視台 ViuTV 亦都會有 19 場精選賽事直播,當中包括了 6 月 14 日上演的揭幕戰俄羅斯對沙地阿拉伯,以及兩場四強賽,仲有決賽。不過礙於本地數碼電視廣播的限制,所以 ViuTV 只提供了 1080i 的全高清解像度直播,所以要睇 4K 世界盃的話,都仲要 join 埋 Now TV 的世界盃 4K 通行證至得,之後就可以安心升級器材等睇「世界波」啦。