「而家 Yamaha 嘅 AV Amp 校機第一個步驟，基本上就係駁支 YPAO 收音咪」
Step 1：基本設定駁支「咪」就搞掂！
「以前校機可能比較麻煩，而家 Yamaha 嘅 AV Amp 校機第一個步驟，基本上就係駁支 YPAO 收音咪，系統就識自動開始校機程序。」當然，校機之前其實都要事先駁好喇叭、電視等等器材啦。
Patrick Lee 專家教路：Yamaha 擴音機設定 step-by-step
2016年05月08日
Yamaha 的高階擴音機系列剛剛推出了 DTS:X 升級，可以支援這款新世代環繞聲格式。其實遠早於這類「3D 環繞音場」之前，Yamaha 已經大玩 DSP（Digital Sound Field Processing），可以模擬出 Roxy 劇場、慕尼黑、維也納音樂廳等各種不同空間的音效。究竟在現時 3D 音效格式之下，Yamaha 的擴音機又可以點樣配合？點設定先至可以獲得最佳效果？我地今次就找來了通利琴行影音部門的 Product Chief、Yamaha 擴音機專家 Patrick Lee 同我哋由基本講起、一步步講解吓點 set 機先至最好！
- 熾
- Chris
通利琴行影音部 Product Chief：Patrick Lee
駁好喇叭、電視之後，第一個步驟就已經可以開始駁咪度聲。
YPAO 一個相當好的功能就是細聲一樣可以做到收音調校，等夜晚比較靜的聲候進行調聲都唔怕嘈親隔離。
揀一個位定多個位？
YPAO 雖然是「自動化」，不過並不是完全自動，用家仍然要選擇一些設定，例如是否要量度喇叭的角度以及天花喇叭的高度、要唔要量度多個聆聽位置等。支援 CINEMA DSP HD3 的機款可以通過附送的收音咪支架，量度 4 個不同位置來獲得所有喇叭的擺放角度，同天花喇叭的高度資料，對音效計算有進一步幫助，建議可以度埋，尤其對喇叭較多的 7.1.4、5.1.4 等系統更實用。
量度的過程可以選擇是否度埋喇叭角度同天花喇叭高度。
如果選擇度埋的話程序會繁複少少，每個聲道都需要利用收音咪座的 4 個位置度一次聲，不過對音效計算有幫助。
「量度最多兩至三個位就好，度 4 個位或以上、計算之後要遷就的因素太多，聲音輸出就會攤薄了。」
至於量度的位置方面，Patrick 就建議一個位起、兩三個位止。「淨係度一個位當然就最好，喇叭輸出遷就得最少，皇帝位或者話最常坐住睇戲聽歌嘅位置可以做到最靚聲。」如果想同屋企人一齊 share、隔離位都想靚聲的話，Patrick 就話：「量度最多兩至三個位就好，通常係皇帝位左右兩邊。雖然 YPAO 可以支援 8 個位，但係度 4 個位或以上、計算之後要遷就的因素太多，聲音輸出攤薄了，音場、定位、結像都會弱咗。」
YPAO 亦支援多個位置度聲，不過 Patrick 就建議一個位起、最多兩三個位，否則容易影響聲效定位同結像。
Step 2：手動調整音效設定
YPAO 的自動調校就已經可以完成約七八成的音效設定，有冇駁喇叭、喇叭「大小」、分頻點要 set 幾多都會度好、校好，「完成之後 save 低，就已經可以開始玩得。」當然，度完都要睇一次設定、睇下有冇唔合理的地方，「例如喇叭距離、明明兩米變咗四米，超低音的距離比較易有偏差，可以手動輸入。」
YPAO 自動調校完成之後，就已經可以記錄低各聲道喇叭的距離、音效特性等資料，有冇駁到喇叭、喇叭擺位等都可以自動偵測到。
喇叭距離可以手動修正，尤其超低音，見到不合理的數字，e.g. 0.5米，記得 set 返啱。
「另外，可以手動微調的設定仲有分頻點、喇叭大細，例如度到分頻點『60Hz』的『大喇叭』，但係又覺得自己的超低音喇叭夠靚、輸出更好，就可以手動改做『80Hz』的『小喇叭』，將更多低頻交畀超低音喇叭處理。」至於邊個設定效果更好？就要自己聽過至知。「有時真係同硬件有關，有時係個人口味，無話邊個一定啱。」
如果系統度到喇叭係「Large」，依然可以將佢設定做「Small」，咁就會將低頻部分交俾超低音喇叭處理，音效有機會更好。
事前定事後做手動設定？
有「自動設定」又有「手動調整」，究竟喇叭大小、分頻點等係咪要自動調校之前就設定好？Patrick 就話：「之前同之後其實都得，之後可能好啲，其實手動調校並唔影響收音咪度聲的部分，因為系統會將喇叭擺位同表現完整記錄，事後調整設定，系統會因應設定的參數來自動調整計算輸出，就算事前設定都會係同一個計算結果。」
擺位、喇叭大小、分頻點等可以事後再設定，因為度聲的過程已經將喇叭特性完整記錄，改變這些設定只是改變系統計算輸出的方法。
Step 3：選擇適當 Parametric EQ
至此已經完成了擴音機九成的調校，最後就要來選擇適當的「Parametric EQ」。Yamaha 擴音機提供了 YPAO 的「Flat」、「Front」、「Natural」等幾個選擇，「如果前置喇叭夠靚的話可選擇 Front，各個喇叭表現平均的話可選擇 Flat，如果喇叭差異較大又想音效配合得自然一點的話，可以揀 Natural。」
Paramatric EQ 同樣可以自己試下，睇下邊一種最適合自己的器材同環境。
善用「Pattern」功能記錄設定
可以手動設置試參數，又有不同 EQ 可以揀，怕唔怕設定改到亂晒、試到亂晒？「其實 Yamaha 高階機有個 Pattern 功能可以儲存低喇叭同音效參數設定，試完唔啱心水可以還原。」Patrick 又話「Pattern 另一個實用的用途係設定睇戲同聽歌的不同參數，一個行多聲道 surround，一個兩聲道 Pure Direct，有唔同分頻點同輸出，聽歌轉睇戲一換就得。」
Yamaha 的高階系列有 Pattern 記憶功能，可以方便用家設定好擺位、分頻點等參數之後 save 低方便還原，之後就可以「任試」各種設定。
「唔同人耳仔聽到唔同嘢，左右耳聽力亦都可以唔同，所以就算機械度到準一準，自己聽落唔係呢回事都冇用。」
Step 4：「驗收」環繞聲效果
最後係「驗收」環節，Patrick 就話呢個先係最重要一環。「唔同人耳仔聽到唔同嘢，左右耳聽力亦都可以唔同，所以就算機械度到準一準，自己聽落唔係呢回事都冇用。」「基本做法係用內置的 Test Tone 功能，試聽一次每個聲道的輸出係咪一樣咁平均，邊個聲道大聲就減少少、細聲就加少少，直到一致為止。」
在手動設定選單內開啟 Test Tone，再逐個聲道試聽音量。
手動調整每個聲道的輸出，因為左右耳聽力可以不同，所以要來回比較大細聲，再做微調。
基本是大聲就減輸出、細聲加輸出，不過如果想天花音效突出一點，可以將天花聲道的輸出稍稍調大半級至一級。
點揀 DSP Program？
DSP 係 Yamaha 擴音機的主打功能，set 好機之後睇戲、聽歌記得揀返對應的 DSP。由於選擇眾多，今次主要講吓 Dolby Atmos 同 DTS:X，想要重現到呢兩種音效，DSP 就要選擇 Surround Decoder 裡面對應的「Dolby Surround」同「Neural:X」，只有呢兩個模式先可以配合到天花喇叭輸出環繞聲效，其他 DSP Program 都唔得。如果播放普通 Dolby 同 DTS 的音效，揀了 Surround Decoder 亦會做返對應的 up-mixing 用天花喇叭出聲。
其他額外設定方面，在音效選單內，記得 set 返「Maximum」的「Dynamic Range」同開啟返「CINEMA DSP 3D Mode」。
下面的「Object Decode Mode」亦要「Enable」，先至可以解到 Dolby Atmos 同 DTS:X 這兩款 Object-based 的音效。
「Hall in Munich B」、「Sci-Fi」等 DSP Program 都用唔到天花聲道，所以如果想玩 Dolby Atmos 同 DTS:X 記得揀返「Surround Decoder」。
Neural:X 同 Dolby Surround 除了對應原本的 DTS:X 同 Dolby Atmos 音效之外，如果影碟只係普通 Dolby 或者 DTS，就可以跟返呢兩個選擇進行 up-mixing。
Dolby Surround 會多一個選項，可以將中間聲道分配到前置喇叭、等中置聲闊一點，睇戲就比較適合「Off」。
播片時依然可以通過遙控的「Option」鍵叫出快捷選擇，快速調校高低音、人聲輸出，一邊睇戲一邊微調可以更容易調整出啱聽的音效。
總結：靠對「耳」好過靠支「咪」！
Yamaha 擴音機的功能同設定都相當多，新手用家望落個 menu 可能有少少無從入手，希望今次的「專家教路」可以幫到大家。
今次訪問的過程當中，Patrick 好多次強調，擴音機的參數好多時靠自己去聽去試。「因為環繞音效其實好受喇叭、聆聽環境等唔同因素影響，網上睇到人地的設定有時未必啱自己，所以做好基本設定之後，最緊要自己去試聽，睇下效果啱唔啱自己，然後再去微調。」收音咪只係輔助，自己對耳先至最緊要。
你可能感興趣的文章
