普通影音 showroom 試玩 Dolby Atmos，大家聽得最多可能都係 7 · 1 · 4，因為呢個都係普通民用 AV 前級同合併機的「極限」。不過，大家可能都知道米樂影音代理的 Trinnov Audio Altitude32 並不是一部「普通」的前級，可以處理多達 32 個聲道，而米樂位於觀塘的新 showroom 亦利用它來打造了一個驚人的 15 · 3 · 10 Dolby Atmos 系統。我們今次就找來了負責人 Ricky 講解一下打造新 showroom 的過程，亦會親身試下呢套「終極」環繞聲系統有幾「堅」。
米樂原本的 showroom 在中環，今次「搬家」大家可能都估不外乎係加租逼遷。Ricky 就透露呢個係原因之一，不過，原來 Ricky 都一早有意搬走。「大家可能都有少少印象，中環 showroom 中間有個大橫樑，喇叭位要避，加上樓底唔高，只有 2.6 米，天花喇叭擺放限制較多，所以都已經想搬。」點解揀觀塘？「因為都想大家就腳可以上嚟試到，揀個偏遠工廈可能可以更大，不過客人就唔方便。」
可以自己揀地方，自然就要用盡器材「潛能」，米樂就一口氣由原本的 9 · 2 · 6 系統升級做而家新 showroom 的 15 · 3 · 10 系統，15 隻環繞喇叭、3 隻超低音，仲有 10 隻天花喇叭。當中 10 隻天花喇叭也是現時 Dolby Atmos 標準所支援的「極限」，所以話米樂的新 showroom 是現時亞洲最強的影音 showroom 也不為過。
15 · 3 · 10 喇叭系統聽落好似好複雜，實際上都可以當係由 7 · 1 · 4 衍生出來。左、中、右喇叭採用了 Procella Audio 的 P815，其他環繞聲道由 P6 同 P5 組成，分別有 Front Wide 一對、Surround 三對、Surround Back 兩對，全部對應獨立聲道輸出，最後天花則有 10 隻 P5。影音空間採用前吸音、後擴散的設計，環繞喇叭置於兩邊牆身的凹槽上，除了方便更換喇叭測試之外，擺位亦可以更加靈活，隨時移位都可以。投影機採用了 Epson 的頂級旗艦 LS10000，幕方面則是英國 Visione 的 THX 認證、170 吋 2.35 : 1 透聲幕，無論聲畫都是頂級享受。
今次米樂的觀塘新 showroom 於 4 月初大致竣工，分兩間試音房，500 呎的大房有 15 · 3 · 10，另一間細房亦都有 7 · 1 · 4。問起用了幾耐時間策劃 showroom 設計同完成裝修？可能大家都唔信，只是短短 4 個月，已經計埋訂料、等料的時間。「都有賴呢段時間走勻全國十幾個城市做嘅超過 100 場『杜比全景聲全國巡展』，訓練充足，基本上任何場地都可以搭建一套靚聲的 Dolby Atmos 系統出來，所以設計自己 showroom 自然事半功倍。」
上得嚟呢間「最強 showroom」，梗係要試一試套 15 · 3 · 10 的環繞聲效果。Procella 喇叭一向勁度十足，睇《葉問 3》就超級爽。拳拳到肉之外，低頻的凝聚力同衝擊力仲好過戲院。《珠峰浩劫》暴風雪圍住吹的包圍感強得好緊要，細節豐富、聲音密度極高，暴風雪真係好似 360 度圍住自己一樣，合埋眼好似真係上咗珠峰！不過講就真係好難完全形容到個感受，米樂新 showroom 離觀塘地鐵站好近，B 出口行兩個街口就到，都係親身試先可以完全體驗到。
查詢：米樂影音
電話：2521 5999
地址：觀塘巧明街 114 號迅達工業大廈 10 樓 D 室（歡迎約試）
