follow us
近年好多朋友升級電視都會直接揀 4K TV，因為普遍價錢已經同 Full HD 型號差不多，而且選擇更加豐富。雖然而家好多 4K TV 都內置 Netflix 等 4K 串流服務，不過如果想享受到最好的畫質，4K Blu-ray / UHD Blu-ray 實體影碟依然係最好的選擇，而家行貨 UHD Blu-ray 播放機已經有好多款可以揀，如果想趁新年升級下的話，今次就同大家分享一下現時市場上的 UHD Blu-ray 機選擇，以及選購上要注意的要點。
如果之前冇接觸過 UHD Blu-ray 的話，可能對影碟同播放機的兼容性有少少混亂，今次首先就簡單講解一下。普通 Blu-ray 機就只可以播 Blu-ray、DVD、CD 等「舊一代」的光碟，UHD Blu-ray 影碟需要 UHD Blu-ray 播放機先至播到，後者同時都可以播埋 Blu-ray 等影碟。所以基本上都係同以前的播放機一樣，有一個向後兼容的關係，新機播到新碟同舊碟，舊機就只係可以播舊碟。而為了照顧仲未太普及的 UHD Blu-ray，所以而家買 UHD Blu-ray 影碟都會跟埋一隻普通 Blu-ray 版本，所以都唔驚未升級 UHD Blu-ray 機播唔到。
隨住 4K 電視的普及，近年 4K 訊源都開始變多，除了 UHD Blu-ray 之外，主要的選擇就是 Netflix、myTV Super、Now TV 等 4K 串流服務。不過為了遷就網速，所以串流視訊多數都經過壓縮，例如 Netflix 就建議 25Mbps 的速度來串流 4K。而普通 Blu-ray 的 bitrate 通常已經有 20-30 Mbps，UHD Blu-ray 就更高，bitrate 代表了每秒的資訊量，也間接反映了畫質，事實上 A/B 比較之下亦都幾易睇出 4K 實體影碟比起同樣內容的 4K 串流細緻度更高，尤其動態畫面的差別會更大，加上 4K 串流只有少部分支援 HDR，而 UHD Blu-ray 就絕大部分都具備了 HDR。所以串流雖然有方便使用的優勢，畫質就依然是實體影碟佔優。
入門型號：功能不弱只輸規格入門 UHD Blu-ray 機的價錢大約在港幣 $3,000 左右，最早推出的 Xbox One S 街價更加已經接近 $2,000，價錢已經好相宜，而且功能方面大部分都幾齊全，例如支援 Netflix、可以串流 Dolby Atmos 音效輸出、具備 Media Player 功能等等。同較高價位型號的差別，主要在於規格，例如高階機接駁端子多一點、用料好一點、支援 Dolby Vision 等等。所以對於普通用家來說，入門級 UHD Blu-ray 機已經好夠用，亦都有唔錯的多媒體播放功能。 ▾ |
Xbox One S 係香港首部行貨 UHD Blu-ray 播放機，而且亦都係現時價錢最平的機款之一。雖然初推出的時候兼容性和功能一般，不過後期通過 firmware 升級已經逐步加入返 Dolby Atmos 串流輸出等功能，加上本身用 App 形式安裝其他附加多媒體應用，所以單就功能來說甚至比起其他高階 UHD Blu-ray 機仲強，而且唔好忘記佢仲係一部遊戲主機。就正如 Blu-ray 年代 的 PS3，Xbox One S 可算是 UHD Blu-ray 年代最抵玩的選擇之一。而專業版的 Xbox One X 就貴一點，不過影音功能相若，所以主打睇碟的朋友 Xbox One S 會更適合。
UP970 係現時 LG 香港唯一的一部 UHD Blu-ray 機，大約 $3,000 元的定價算係入門型號。不過同 LG 的 4K 電視早早引入 Dolby Vision 的 HDR 格式一樣，UP970 雖然係入門機，不過都支援 Dolby Vision，睇《狂野時速 8》、《小丑回魂》等影碟的時候就可以有更強的動態效果。本身亦都支援 Netflix、YouTube 的 4K 內容，設有兩組 HDMI，一組 2.0a 負責 UHD 視訊、一組 1.4 負責音頻輸出，亦支援 Dolby Atmos 等音效。如果本身的 4K 電視已經支援 Dolby Vision 的話，UP970 是一個幾抵用的配搭。
售價：$2,990
由初代的 DMP-UB900 到最近 CES 上公佈的 4 個新型號，Panasonic 可以話係推出最多 UHD Blu-ray 播放機的品牌，比較可惜的是香港並無引入高階型號，首先推出的反而是入門的 DMP-UB400，有少少試水溫的意味。不過雖然是入門機，但 DMP-UB400 的影音功能其實幾齊全，本身採用了 Panasonic 的 Smart TV 系統，內置了 Netflix、YouTube 等 Apps。內置 Wi-Fi，DLNA 功能可以播放 MKV、MP4、JPEG 等多媒體檔案，而且可以播埋 Hi-Res 音樂，包括 FLAC、WAV、ALAC 等等，最高可達 32bit/192kHz，更支援埋 DSD 5.6MHz，做埋網絡音樂播放器都可以，幾適合預算有限，又想睇碟、聽歌都兼顧的用家。新一代的 DMP-UB420 主要是加入了 HDR10+ 同 Dolby Vision，算是小升級，不急用的朋友可以等下，不過暫時都未知香港會唔會引入。
唔講大家可能無留意，第一個推出 UHD Blu-ray 機的品牌其實就係 Samsung，全球第一部 UHD Blu-ray 機就係 UBD-K8500，同今次介紹的 UBD-M8500 係咪好似？後者可算係第二代入門機，亦都係 Samsung 香港而家唯一的 UHD Blu-ray 機。比起舊版主要係減剩一組 HDMI，以及一些串流功能的更新。內置 Wi-Fi，支援 HDR10、Dolby Atmos 和 DTS:X 的串流輸出，Smart Hub 具備 Netflix、Amazon、YouTube 等功能。功能比較基本，不過如果只係想睇吓 UHD Blu-ray 和 Blu-ray 碟的話，就係現時街價最平的選擇。
售價：$3,290
中階型號：畫質有保證外加主打靚聲相比起上面介紹的入面機款，中階機主要是晶片、解碼、用料會比較好，從而有更佳的聲畫表現，畫質方面的差別可能相對較細，反而是音效方面會有較大的提升。另外對於本身已經有一定的家庭影院器材的朋友，由於機身解碼質素同能力較強，加上較為豐富的接駁端子，可以同現有的影音、音響系統配合得更好。 ▾ |
9 月 14 日更新：
延續出色聲畫質素Pioneer UDP-LX500Pioneer 推出的首部 UHD Blu-ray 機 UDP-LX500，延續了以往由 LD-X1 到 BDP-LX88 對影音質素的追求，並且加入了現時最新的技術。支援 UHD Blu-ray、Blu-ray、DVD、CD 以及 SACD 播放，兼容 HDR10 及 Dolby Vision 的 HDR 格式，並且配備 HDR → SDR 功能、支援 4K 增線。雙 HDMI 輸出的設計，可設置聲畫獨立輸出，Direct 模式則可以關閉所有影像線路，獲得最佳的音質，作為獨立的 CD 唱盤使用也十分適合。機身更加採用了三區域獨立區塊設計、減少相互電磁干擾，配備了剛性和寧靜的 UHD Blu-ray 碟盤，1.6mm 底殼更加配上 3mm 厚鋼板加固，雙層機殻底板設計、降低重心、加強穩定性，全部都是為了獲得最穩定、準確的播放效果而設。
UDP-LX500 設有 RCA 模擬音頻輸出，配合 Direct 模式，作為純唱盤使用都可以。而雙 HDMI 則可以設定為聲畫獨立輸出，獲得最好的聲畫質素。
延伸閱讀：【評測】Pioneer UDP-LX500：聲畫表現俐落高質 香港售價夠進取 |
講到高階 Blu-ray 機，可以話係 OPPO 的天下，BDP-103D、BDP-105D 都是相當出色的 Blu-ray 機選擇，所以大家都好期待 OPPO 可以推出 UHD Blu-ray 播放機。而 OPPO 第一部 UHD Blu-ray 機 UDP-203 就在 2016 年尾正式推出。內置了專業級的四核心 Cortex A-53 晶片 OP8591 作畫面處理，而音頻方面則採用了 32-bit AK4458VN。設有一組 HDMI 輸入及兩組 HDMI 輸出，支援聲畫獨立傳輸，而且也保留了 7.1 聲道模擬輸出，接駁上可以更加靈活配搭。上年再升級埋 Dolby Vision，影音規格方面可以話幾強，對於有一定預算、對聲畫質素有要求的用家，係一部性價比幾高的選擇。
Cambrige Audio 的 CX 系列 CXU Blu-ray 機口碑相當不錯，最新推出的 CXUHD 主打自家的動態畫面調製及聲效處理，設計上移除了內置的 DAC 解碼器同相關的數碼電路，有助降低訊號干擾、提升音頻及視頻質素。支援 Dolby Vision 以及 HEVCH.265、H.264、VP9 4K 和 Hi10P 視頻解碼，可以通過機身的兩組 USB 播放各種多媒體檔案。除了影片之外，也支援 WAV、FLAC 等 Hi-Res 音樂播放。同 OPPO 其他幾款中高階 UHD Blu-ray 機一樣支援 SACD 播放，對於喜歡 Cambridge Audio 聲底的朋友，除了睇碟之外、即使聽歌也是現時最好的選擇之一。
頂級型號：只得 OPPO 可選暫時萬元級的行貨高階 UHD Blu-ray 機只得 OPPO 可以選擇，分別是摩改升級版的 UDP-203 SE 歐酷版，以及頂級型號 UDP-205。兩者都支援 HDR10、Dolby Vision 等影音規格，配合埋 UHD Blu-ray，可以話提供緊現時最高質素的聲畫輸出。 ▾ |
畫質方面 UDP-205 可算是現時最佳的選擇。另外兩者都強調音效方面的表現，UDP-205 配備了兩組 ESS 的旗艦 DAC 晶片 ES9038PRO，一組負責環繞聲處理，另一組則負責兩聲道音訊，亦支援作為 USB DAC 使用，最高可對應 768kHz PCM 及 DSD 512 解碼，機身亦內置獨立耳擴。
OPPO UDP-203 Special Edition 就同之前 BDP-103D SE、BDP-105D SE 一樣是著重音質方面的提升，歷時半年的摩改設計，改用了大量發燒級元件（詳情可參考：經歷半年時間研製 OPPO UDP-203 SE 摩改後聲效更強）。音質某方面甚至比 UDP-205 更突出，適合除了睇碟，亦都著重聽 CD 表現的朋友。當然，如果對聲畫都有極高要求，又有足夠預算的話，可以等日後推出的 UDP-205 SE。
售價：$8,999（UDP-203 SE）、$12,699（UDP-205）
延伸閱讀：經歷半年時間研製 OPPO UDP-203 SE 摩改後聲效更強
延伸閱讀：享受最強聲畫表現 OPPO UDP-205 現場實測
請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。
