三合一 Hi-Fi 駁喇叭就聽得
TEAC NR-7CD 顧名思義當然支援 CD 播放,而 NR 則是指網絡串流及合併擴音功能,一部機集齊三種主要功能於一身。外形方面採用了「New Vintage」設計, 復古的金屬機身,前面板配備了大螢幕錶頭,除了以儀錶針指示輸出、感受到音樂的動態之外,開機之後就會著起橙黃燈光,夜晚播歌的話真係幾有型。利用配套的 TEAC HR Streamer 可以方便地串流手機或者平板、NAS 以及 TIDAL、qobuz 上面的無損音樂,亦都支援 AirPlay。可惜暫時手機 App 只有 iOS 版本,不過 Android 用家都可以通過 BubbleUPnP 等軟件來控制串流播歌,一樣方便。Hi-Res 音樂方面支援到 24bit/192kHz PCM 以及 DSD5.6MHz,串流一樣兼容。另外,雖然定位係頂級機款,不過 NR-7CD 都內置了藍牙,可以比較方便地連接播歌,但係都支援到 LDAC 的高音質藍牙傳輸,此外亦支援 aptX 及 AAC,只係少了 aptX-HD。