重料型格的一體式座地喇叭

一體式喇叭同座地喇叭阿熾都試得多，不過一體式座地喇叭，仲要係一張復古桌子一樣的設計就真係好少有。其實 R7 MK3 有兩種安裝方式，可以座檯擺放或者座地擺放，兩種腳墊 / 腳架配件都會附送。不過無論座檯定座地，R7 MK3 都需要一定的空間來擺放。大箱身的喇叭當然有其好處，內置了一對 140mm 全音域單元，機底更設有一組 200mm 長衝程低音單元，配合 Class AB 擴音器，提供 160W 輸出，音量十分充足。喇叭本身亦都份量十足，重達 30kg，木紋箱體質感相當好，喇叭頂部就有 Ruark Audio 特色的圓形機身排鈕排佈。值得一提的是 R7 MK3 跟機的遙控都採用了同樣圓形的設計，而且以 radio-link 射頻方式連接，隔著牆都可以進行控制。

內置 aptX-HD 及 Wi-Fi 支援 Multi-room

R7 MK3 這個大箱體入面內置了相當豐富的功能，前面板有吸入式的 CD 盤，左邊則是小型顯示屏，顯示效果極之清晰細緻，而且支援中文歌名。可以通過 LAN 或者 Wi-Fi 連接網絡，支援 Spotify Connect 或者 DLNA 播歌，此外還有藍牙 aptX-HD 可以無線播放。機身的連接亦都好齊全，包括有光纖 × 2、RCA Audio × 2、USB、Phono（連接地端子）輸入，另外仲有一組 RCA Line Out，加埋支援 DAB 及 FM 廣播，可以話訊源同接駁都好豐富。值得一提的是網絡連接方面，R7 MK3 仲支援 Multi-room 功能，可與其他 Ruark Audio 的無線喇叭組合播歌，Ruark Audio 亦都推出了 Ruark Link 手機 App ，可以方便地設定 R7 MK3 的各種功能以及控制播歌。

機身操作：支援中文顯示　用 App 設定和播歌更方便

R7 MK3 的機身操作好方便，圓形的遙控器使用時反應好快，雖然前面板的顯示屏不算大，不過顯示就十分清晰，而且亦都支援中文歌名。不過喇叭通過機身選單做音效設定就有少少麻煩，要入幾重選單。用 Ruark Link App 設定的話會方便好多。另外，雖然 DLNA 功能通過遙控配合機身屏幕都可以去到 NAS 播歌，不過同樣唔及用 App 控制方便。

音樂播放：聽歌有 Hi-Fi 感　3D 音場更埋身

雖然「Hi-Fi 感」好似有少少空泛，不過用 R7 MK3 播歌的確幾有 Hi-Fi 的感覺。主要可能平時聽開一體式音響，就算音質比較好可能都只係限於「比較好」的層次，而 R7 MK3 聽落讓人的感覺是一套認真製作、著重音質的 Hi-Fi。整體分析力相當唔錯，人聲同樂器都結像清晰，可以做到一定的定位效果，下向的 200mm 長衝程單元表現更加幾令人滿意，低頻量感和質感都交足功課。外表上可能令人覺得只係著重外形、用作裝飾，實際上係令人想要認真聽音樂的兩聲道 Hi-Fi。當然，本身 R7 MK3 的體型就比得上小型座地喇叭，而且價錢亦都不遑多讓，有這樣的表現亦都份屬應當，不過係外表有少少誤導了大家而已。

之前試過 R4 MKIII 的 3D 音場模式效果幾過癮，今次 R7 MK3 都配備了這個模式，而且可以話係「加強版」。有賴下向式的低音單元，R7 MK3 開啟 3D 音場模式之後音樂更加埋身，而且低頻包圍感更好，那種立體聲在左右耳之間穿梭的感覺好立體，甚至有時結他聲或者鼓聲埋得太近，令人有少少嚇親。唯一缺點係中低頻的共鳴感稍強，會稍為影響了人聲的分析力，壓低了少少人聲。不過用來聽現場演唱或者演奏效果當然好好，聽返普通唱片亦都有不一樣的體驗，好值得一試。另外，雖然 R7 MK3 只支援到 CD 質素的檔案，不過細緻度都幾令人滿意。

總結：尊貴又型格的靚聲體驗

R7 MK3 係一款重磅又重料的喇叭，價錢以一體式音響來說係幾貴，不過 R7 MK3 在音質方面又的確交到功課，復古型格的外表可以當做係 bonus（又或者掉返轉，外形值回票價，音質係 bonus）。值得一提的是，雖然 R7 MK3 的藍牙已經係 aptX-HD 規格，不過比較起用 DLNA 來聽歌，後者分析力明顯再好一點，所以想享受最好音質的話，仍是以網絡串流的效果最好。

Specifications
R7 MK3
音樂播放：CD、DAB、FM、藍牙 aptX-HD、Spotify、DLNA
單元：2 × 140mm 雙同軸、200mm 長衝程低音
功率輸出：160W（AB 類）
輸入：RCA Audio × 2、Phono（MM）、光纖 × 2、USB、LAN
體積：185 × 1,000 × 425mm（連座枱膠腳）、650 × 1,000 × 400mm（配喇叭腳）
重量：30 kg
售價：$26,800
查詢：大昌影音（2262 1173）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。