2.1 聲道設計　將超低音內置到 Soundbar

其實 Sony 在上年推出過 HT-MT500 同 HT-MT300 小型 Soundbar，同今次的 HT-S200F 都有少少似。當時阿熾都幾有興趣，不過可惜設有 HDMI 的 HT-MT500 太貴（定價 $4,980）、較平價的 HT-MT300（定價 $2,380）就只有模擬同光纖輸入，接駁較為不便。今次 HT-S200F 可以話集齊了 HDMI 接駁同平價（定價 $2,290）兩個元素，雖然少了外置的無線超低音、低頻效果會打了折扣，不過 HT-S200F 小巧的 Soundbar 底部就已經設有獨立低音單元，2.1 聲道、一體式設計在擺位上相對又更靈活。

HDMI 支援 ARC　另有光纖及藍牙輸入

HT-S200F 採用 S-Master Amp 放大技術，總輸出功率為 80W（25W × 2 前置、30W 超低音），不算特別高。支援 S-Force PRO 環繞音效技術，實際效果下面再同大家詳細試吓。機身設有一組 HDMI 輸入、支援 ARC 功能，最主要的接駁方式就是直駁電視，播放 UHD Blu-ray、或者機頂盒時，音效就再經電視傳送到 Soundbar 輸出。另外仲設有光纖輸入，可以駁多一部器材。想簡單播吓歌的話，就可以用藍牙 4.2 連接手機無線播歌，另外都支援 Wireless TV Connection 功能，可與自家兼容的電視無線連接出聲。

音效測試：小規模 2.1 聲道效果

作為一款小型 Soundbar，HT-S200F 的輸出音量的確不算好強，最盡大約可以應付 150 呎空間，比較理想係 50 至 100 呎左右的聆聽環境、設定約 7 至 9 成音量。由於 Soundbar 本身較細、左右聲道單元會靠得較近，所以如果坐得太遠的話音場會變得較窄。用家坐在大約 1 至 2 米的距離，可以呈現到不錯的立體聲定位。睇《移動迷宮：死亡解藥》最初頭劫火車救人一段，左右的奔跑、飛車都做到清晰的方向感，雖然音場未至於好闊，不過都做到一個 Soundbar 同用家之間的小型音場空間。

內置超低音喇叭的設計有少少限制，因為同 Soundbar 本身捆綁在一齊，坐得遠低頻就自然會細聲一點，要靠遙控手動推高補償返。同電視內置的喇叭相比，低頻的量感同擴散感當然好一截，不過同獨立的外置超低音相比又有一段距離，所以只算係一套小規模的 2.1。Soundbar 整體分析力不錯，睇《金剛：骷髏島》一些爆炸、巨獸打鬥的場面，人聲依然不受干擾、保持清晰，值得一讚。

總結：擺位靈活適合細空間使用

HT-S200F 係一套相當緊湊輕便的 Soundbar，2.1 聲道設計，有一定的低頻及立體聲效果，可以呈現到小空間的音場同包圍感，整體分析力亦都不錯。由於體型同設計所限，音量同低頻輸出不算十分強，比較適合「蝸居」甚至擺電腦檯面使用。阿熾就試過擺 office 檯面睇戲，效果係幾唔錯，不過都要留意睇片睇戲的時候，用家要退開少少同 Soundbar 保持到一米距離，先至有比較立體的音場效果。

Specifications
HT-S200F
聲道：2.1
功率：80W（25W × 2 前置、30W 超低音）
支援音效：Dolby Digital、DTS
體積：580 × 64 × 95mm
重量：2.3kg
售價：$2,290
查詢：Sony（2833 5129）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。