6 色選擇超豐富　喇叭前後皆有型

不得不提今次 GPO Westwood 開箱之後，阿熾有少少分唔到喇叭前面同後面，因為前後設計都幾有型。前面是簡約配搭，黑白間網面，正中有 GPO logo；後面就有開關、高低音的旋鈕，望落似足七、八十年代的收音機，如果唔係有電源、RCA 等端子，相信好多人都會以為這邊才是正面。喇叭走型格復古路線，當然價位所限，旋鈕、機身以塑膠為主，不過望落就幾有質感，似足一個超小型真皮行李箱，四角的金屬包邊除了令復古設計更完整之外，也有保護作用。喇叭有成 6 隻顏色選擇，包括較為傳統的黑色同棕色、較為前衛的紅、藍、綠色，基本上可以滿足晒唔同喜好的用家。

有線無線輸入有齊　高低音調校夠靈活

除了支援藍牙連接之外，GPO Westwood 也設有 RCA 以及 3.5mm audio 輸入，加上本身的復古外形，GPO 就好推薦配合埋自家復古設計的唱盤使用。25W 的輸出不算強，不過中細尺寸空間聽歌都夠用。喇叭內置了獨立的低音單元，機身也設有高音及低音的調校旋鈕，可以很方便地根據自己的口味來調節音色，相當靈活。而 GPO 另一款 Mini Westwood 藍牙喇叭同樣也採用了高低音旋鈕的設計，雖然比起 Westwood 細兩個碼，不過音量幾充足。同樣係復古的外形設計，而且內置了充電池，可以拎出街使用。

藍牙播歌測試：音樂感不錯、高低音調校幾好玩

GPO Westwood 的藍牙配對設定很方便，機身有「FUNCTION」按鈕去選擇藍牙或者 AUX 有線輸入，當轉去藍牙輸入而喇叭未有配對好的裝置的話，就會自動進入配對模式，手機找到 GPO 然後連接就可以。Westwood 雖然是用藍牙連接，不過分析力算是不錯，聽衛蘭〈Lonely〉、JW〈你帶著我的青春離去〉、王菲〈你在終點等我〉幾首女聲還原度都幾好，未至於極之清晰細緻，不過音樂同人聲細節都呈現得到。尤其〈你在終點等我〉幾有韻味，喇叭的音色同外形都幾夾。

聽 Supper Moment〈靈感床〉呢類較 Rock、節奏較強的音樂，試吓調節吓低頻旋鈕加強輸出，效果幾唔錯，低音明顯增強，而分析力同彈性都保持到，用來調節音色幾實用。高音調節都有一定效果，不過預設的輸出本身已經不錯，可能遇著某些弦樂、女聲先需要調整。

總結：復古型格、價錢抵玩

一千蚊左右的售價，可以買到復古型格的設計、幾有音樂味的藍牙喇叭，Westwood 算係幾抵玩。音量輸出唔算強，比較適合房間使用，不過既可以作為裝飾、又有得無線聽歌，高低音調校更加方便適合不同用家口味，「配套」幾全面，係一個價格相宜、睇得又聽得的選擇。

Specifications
Westwood
功率：25W
接駁：藍牙、RCA、3.5mm audio
體積：260 × 110 × 175mm
重量：1.8kg
顏色：黑、紅、棕、藍、綠、奶白
售價：$1,280

Specifications
Mini Westwood
功率：5W × 2
接駁：藍牙、3.5mm audio
體積：184 × 106 × 115mm
重量：0.8kg
顏色：黑、紅、啡
售價：$800

查詢：新輝電子科技（3543 1111）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。