Xbox One S 會在 11 月 25 日正式發售，除了成為首部在香港推出的 UHD Blu-ray 播放機之外，最低 $2,680 的售價也是市面上最平的選擇之一。不過用遊戲機來播影碟，表現會否令人滿意？在影音應用方面的功能又是否齊全？今次我們就將 Xbox One S 當作純 UHD Blu-ray 機詳細測試一下，睇下是否真係「抵玩」。 延伸閱讀：買 Xbox One S 播 4K Blu-ray？ 準用家要知的 5 件事
Xbox One S 會在 11 月 25 日正式發售，除了成為首部在香港推出的 UHD Blu-ray 播放機之外，最低 $2,680 的售價也是市面上最平的選擇之一。不過用遊戲機來播影碟，表現會否令人滿意？在影音應用方面的功能又是否齊全？今次我們就將 Xbox One S 當作純 UHD Blu-ray 機詳細測試一下，睇下是否真係「抵玩」。
用過頭一兩代 Blu-ray 機的朋友可能都有印象，好多機讀碟速度都慢得驚人，播部分影碟、例如《蜘蛛俠》，等候時間可以超過 5 分鐘，令人以為「hang 機」。今次 Xbox One S 以初代 UHD Blu-ray 播放機來說，讀碟速度算令人滿意。由放入影碟計，基本上 UHD Blu-ray 可以在 10 秒內完成讀碟，有時會用多幾秒讀取選單介面的時間，播普通 Blu-ray 的話就 7 秒左右已經進入影碟選單介面。
Xbox One S 的 UHD Blu-ray 播放，可以說是通過一個「播放 App」進行，雖然新機到手的時候已經見到有得 update，不過為免升級過程有咩「意外」導致機都無得試，所以都先行試播幾隻碟睇下。當中《末日先鋒：戰甲飛車》無法播放、《變種特攻：天啟滅世戰》有聲無畫，不過升級了播放 App 之後，手頭上十幾隻 UHD Blu-ray 都可以正常播放。加上播放器以 App 形式運作，日後即使遇到兼容問題，相信都會比較容易通過軟件升級解決。
Xbox One S 播碟用手掣操作，同之前的 Xbox One 一樣，雖然可能同大家用開遙控操作好唔同，不過稍為摸下就可以上手。由選單操控，到快進快退等操作都算幾流暢，只有很輕微的延遲，表現幾好。
本來 Xbox One S 主打就是遊戲功能，所以本身並不預期會有太多影音方面的設定項目，不過點入選單一睇，可以設定的選項比預計中豐富，而且兼容性資訊亦相當齊全，使用方面相當實用。
播放測試部分，主要以 UHD Blu-ray 影碟測試 4K、HDR 的畫面效果，也會和普通 Blu-ray 版影碟比較一下。配合做測試的電視是具備 4K 解像度、支援 HDR 同 3D 顯示的 55 吋 LG UH8500，擴音機則是支援 4K pass-through 的 Pioneer VSX-831。接駁時要留意 HDMI 要連接支援 HDCP 2.2 的端子，先可以確保完全兼容 4K HDR 的顯示。
難得終於可以用 4K 電視慢慢欣賞下 UHD Blu-ray，所以今次都試了唔少影碟。以《末日先鋒：戰甲飛車》為例，畫面細節相當豐富，精細到連女主角眼球上的血絲都可以清楚見到，Xbox One S 播碟的解像力相當不錯。尤其而家買 UHD Blu-ray 碟會連一隻普通 Blu-ray，A/B 比較之下，初睇 Blu-ray 會覺得都幾精細，但係一轉睇 UHD Blu-ray 會覺得明顯再上一個層次，由金屬車身、人物衣著等都可以睇到更豐富的細節。
同之前試 HDR 的情況類似，用 Xbox One S 播 4K Blu-ray 的 HDR 畫面，也是在光差較大的場面之下效果會較明顯。睇《天煞地球反擊戰2》就有唔少背光畫面，可以清楚感覺到天空那種亮光的強度，同時雲層、海浪等暗位仍能保持細節，整個光暗過渡效果更加逼真。而一些室內連室外景的光暗對比亦可以保持得很好，缺點就是睇得強光畫面多，對眼會較易疲勞，這也算是 HDR 的小小缺點吧。
今次測試的時候，其實一駁好 Xbox One S 同電視，「4K 電視詳細資料」是顯示為並不支援 HDR、10-bit 等視訊，播碟亦都只有 4K 無 HDR。經過一輪嘗試之後，發現要啟用電視的「HDMI ULTRA HD Deep Color」功能先可以正常接收 HDR 視訊。如果大家買了 Xbox One S，又發現與自己的 4K HDR 電視不兼容，可以試下在設定方面著手，設定好之後甚至需要重新開機。此外，如果中間接駁擴音機的話，記得要駁落支援 HDCP 2.2 的 HDMI 端子，先可以確保有較好的兼容性。
Xbox One S 播放 UHD Blu-ray 的畫面解像度很好，HDR 效果可正常顯示，動態畫面的流暢度亦十分不錯，如果要講有甚麼做得未夠好的話，雜訊算是其中一項。睇《天煞2》、《末日先鋒》《蝙蝠俠對超人》等比較多暗位的影碟，都可以感覺到畫面雜訊稍多，雖然未算太明顯，不過由於 4K 畫面實在太精細，所以雜訊會有少少礙眼，稍稍影響了畫面細緻度，算是一個小缺點。
Xbox One S 的功能主要通過 App 形式擴充，幾個免費的多媒體播放應用程式基本功能都幾齊全，可以播放 WAV、Flac（24bit/96kHz）、MKV、RMVB 等等。Netflix App 支援 4K、HDR 串流，對 Netflix 用戶來說可算是一個 bonus，其他 Apps，好似 tunein 網絡電台、YouTube、twitch、Groove 音樂等都有得安裝使用，雖然同手機 Apps 相比數量相差很遠，不過都有一定的擴充能力，可作為一部基本的媒體播放器用都得。
Xbox One S 播放 UHD Blu-ray 的兼容性同畫質都相當唔錯，可以將新一代影碟的 4K 精細度、HDR 的高動態都完整呈現，日後升級埋 Dolby Atmos 串流輸出的話，功能就更完整更抵玩。對於筆者呢類不打機的人來說，即使淨係作為睇碟之用、以 $2,680 的價錢依然相當有吸引力。
售價：$2,680
查詢及購買：https://www.microsoftstore.com.hk/
緊貼最新資訊，請關注 SPILL 的 Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。
