Soundbar 給人的印象大概就是音質比起電視好一點，不過就未至於有好靚的環繞聲效，中價或者入門 Soundbar 尤其如此。Cambridge Audio 推出的 ODB2 新一代 Soundbar 雖然 $4,000 有找，而且簡約有型的設計加好易令人歸類做「賣樣」的類別，不過實際試過之後發現音質好有驚喜，幾抵玩。而更抵玩係而家有同 HMV 的合作推廣，買 HMVOD 28 個月通行證（$2,464）就換到 ODB2 棟篤特工版（價值 $3,900）！

適合現代家居的易用 Soundbar

Cambrdgie Audio 之前推出的 TVB2 是旗下首款 Soundbar 產品，當時已經幾受歡迎，新推出的 ODB2 就更新了設計，而且進一步提升了音質。今次 ODB2 同樣是主打為新世代 4K 薄屏電視而設，本身純黑纖巧的 Soundbar 主體擺檯面或者掛牆都幾適合，隨機已經附送了掛牆架。超低音喇叭採用無線設計，加上大小適中，家居擺位會幾靈活。同樣係純黑箱身加上玻璃頂設計，幾有型同質感好好，夾埋係一套簡約有型同纖巧的組合，好適合現代家居。

接駁齊全支援 4K HDR

ODB2 備有 3 入 1 出的 HDMI 端子，支援 4K HDR 視訊 pass-through，無論駁 4K UHD Blu-ray 機或者 myTV 等 4K 機頂盒都支援到。另外 HDMI 輸出亦支援 ARC 功能，可以回傳電視聲效，簡單連接 Soundbar 同電視就可以令平時煲劇的聲效有幾大提升。此外，ODB2 都仲設有光纖同 3.5mm audio 輸入，可以額外連接多兩樣器材，加埋支援 NFC 配對的藍牙連接播歌，如果不想太大陣仗，又擴音機又喇叭的話，用 ODB2 就已經可以打造到一個接駁和功能幾齊全的家庭影院系統。

音效測試：立體通透人聲一流　環繞效果爭少少

設定 ODB2 好容易，只需要用 HDMI 連接 OPPO UDP-205 作為訊源，再將 Soundbar 輸出以 HDMI 連接到 Sony Z9D 支援 ARC 的 HDMI 3 就可以。睇電視、Netflix 等的音效可以直接回傳到 ODB2 輸出，用 UDP-205 播放 4K UHD Blu-ray 亦都可以順利將 4K HDR 畫面 pass-through 到電視，ODB2 似乎暫時未支援 Dolby Vision，不過反正有 Dolby Vision 的影碟暫時都不算多，所以問題不大。

測試器材：

電視：Sony 65 吋 Z9D
Soundbar：Cambridge Audio ODB2
UHD Blu-ray 機：OPPO UDP-205

ODB2 有電視、電影、音樂及聲音 4 組 EQ 模式可以揀，通過遙控就可以直接選擇，睇戲當然就揀返「電影」模式。今次首先用了《小丑回魂》來測試，開頭雨中追紙船一段其實對 Soundbar 來說相當有挑戰性，不過 ODB2 表現可以話好唔錯。雖然由於 2.1 聲道設計，環繞效果未至於好強，不過 Cambridge Audio 的 BMR 單元係幾有料到，加埋自家的聲效處理，可以在前場營造到一個幾立體的聲效空間，雨聲、奔跑聲、流水聲、撞欄跌倒的碰撞聲都好有層次好通透、細節十足。另外值得一讚的是人聲表現，還原度極之高，而且結像立體清晰有質感，由室內到室外、真人聲到對講機聲的轉換都做到好細緻像真。

低頻及包圍感：有質感有彈性　稍稍不夠爽快

之後再試《鄧寇克大行動》，ODB2 的超低音喇叭不算巨型，初頭都擔心低頻表現一般，但係一試效果又幾唔錯。同樣係最初頭一段，主角被敵兵掃射追殺，槍聲結像好實淨，襯底的節奏配樂幾細緻而且滲透力都夠強，包圍感唔錯。唯一係低頻稍慢少少，令到一些槍聲、爆炸聲不夠爽快俐落，不過依然都保持到幾好的低頻衝擊力，睇一些大場面都夠氣氛。另外，6.5 吋單元不算十分大，所以低音下潛就稍稍不夠深，不過能量就幾足夠，試音室 200 幾呎的空間都夠用。而且配套的這一隻無線超低音的低頻彈性好唔錯，中段潛艇被炸毀一幕爆炸聲的質感做得幾好，量感亦都幾足夠。另外，超低音輸出可以通過遙控獨立調校，不過預設的效果已經幾適中。

音樂播放：人聲繼續出色　聽歌效果同樣唔錯

由於試完上面兩套戲，阿熾都覺得 ODB2 的人聲同電影配樂的呈現實在好靚，所以忍唔住再用《星聲夢裡人》、《異形：聖約》同藍牙播歌再試真少少效果。發現 ODB2 用來聽歌的確都好唔錯，人聲繼續保持到通透立體、還原度十分高，睇《異形》初頭彈琴、尾段吹笛兩段，鋼琴聲同笛聲的質感都好突出，可以話睇戲、聽歌兩方面都兼顧得好好。

總結：$2,464 超級抵買　同價位最好聲選擇

阿熾試 ODB2 的時候未有推廣優惠，以原價 $3,900 來說 ODB2 依然物有所值，甚至單以音質、音色來說比起同價位 Soundbar 的表現仲要再高一線。上個星期 Cambridge Audio 公佈了同 HMV 的 HMVOD 電影串流合作優惠，購買 HMVOD 28 個月通行證（$2,464）就免費換到 ODB2 棟篤特工版一套，價錢可以話超抵玩，同價位幾乎無對手。無論係正好想試吓 HMVOD 而有得送 Soundbar，定係為了 ODB2 而特登買 HMVOD 的通行證，都一樣超值。

優惠詳情可以參考：

現凡於 2018 年 3 月 15 日至 5 月 31 日期間購買 HMVOD 28 個月娛樂影視通行證（$2,464），即可免費獲得 Cambridge Audio ODB2 最新藍牙形喇叭連無線低音套裝棟篤特工版（價值 $3,900），讓您的家瞬間變成迷你私人影院。

Specifications
ODB2
輸出功率：120W
單元：2.25吋 × 2（全頻）、6.5吋（低音）
端子：HDMI×3（輸入）、HDMI（輸出）、光纖、3.5mm audio
體積：880 × 74.5 × 46 mm（Soundbar）、180 × 364 × 278 mm（超低音）
重量：1.63kg（Soundbar）、4.9kg（超低音）
售價：$3,900
查詢：Cambridge Audio（2882 4000）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。