近年好多數碼、影音器材的命名都有少少「Apple 化」，好似今次測試的 Bose 全新「便攜式智能揚聲器」個型號就叫做「Bose Portable Home Speaker」，單睇名幾令人混淆。不過睇到喇叭個樣相信大家都唔會陌生，雖然同之前推出的 Home Speaker 500、300 同樣屬於 Bose 智能揚聲器系列，不過外形就同之前幾受歡迎的藍牙喇叭 Revolve、Revolve+ 如出一轍，同樣為便攜式 360 度發聲，不過就加入了 Wi-Fi 串流功能、支援 AirPlay 2、Spotify Connect 等等，功能更強。
Bose Portable Home Speaker 採用了近似 Revolve、Revolve+ 藍牙喇叭的圓柱形設計，191.5mm 的高度、只重 1.06kg，加上機身上面有手挽，可以好方便拎去不同地方聽歌。喇叭主要以一個長衝程全頻單元配合自家專利的聲學導流技術（Deflector）由中間向下經過導流管發聲，配合三組圍在圓柱體上面的被動式單元，可以提供到 360 度均勻聲效之外，低頻效果同音樂動態應該都幾唔錯，幾適合 party 使用。無縫陽極氧化鋁的外殼，黑、銀兩色的機身質感都相當唔錯，有 Bose 喇叭一貫的質素。IPX4 的防水等級雖然無得擺落水使用，不過戶外用、淋吓雨都無問題，仍算方便。
比起 Revolve 和 Revolve+，Portable Home Speaker 最大的「升級」就是加入了 Wi-Fi，可以支援 AirPlay 2、Spotify Connect 以及 TuneIn 等音樂串流功能，令到聽歌更方便。尤其是多人使用的情況之下，藍牙始終要一個個配對連接和切換，AirPlay 2 和 Spotify Connect 就只需要連接到同一 Wi-Fi 網絡開 App 播歌，就可以揀 Portable Home Speaker 出聲，可以同藍牙互補不足。唯一係缺少了 Chromecast 功能，Android 用家例如聽 MOOV 的話就只能用藍牙連接了。Portable Home Speaker 除了可以同 Home Speaker 500、300 智能喇叭系列組成 Multi-room 系統之外，亦都可以利用 Bose SimpleSync 功能同步埋藍牙喇叭，即係組合埋 Revolve 一齊增加音量、播同一首歌都可以，亦都係另一個方便 party 聽歌的設計。續航力方面，由於加入較耗電的 Wi-Fi，充滿一次電可以使用 12 小時，比起 Revolve+ 少 4 小時，不過日常使用應該都幾足夠了。
除了喇叭頂部的輕觸式按鈕操作之外，Portable Home Speaker 主要通過 Bose Music App 來操控及設定，例如調節高低頻 EQ、語音提示語言（支援廣東話）、組合喇叭設定 Multi-room 功等等。雖然功能唔算非常多，不過基本設定都有齊，另外 firmware 升級都係通過 App 進行。
Portable Home Speaker 的 360 度發聲效果幾均勻，基本上不同角度、擺在空間不同位置聽都有幾理想的效果。3 組被動式單元提供的低頻衝擊力同量感都唔錯，亦都係 Bose 一貫的音色個性，爽快有力，低頻的餘音延伸亦都幾恰到好處，以一體式喇叭來說值得一讚。機身雖然唔算好重身，不過有底部膠邊減震，所以整體穩定性幾好，大音量之下都不會有好勁的諧振，對音質影響輕微，聽 Supper Moment 的重節奏音樂好過癮。
不過以一個全頻單元發聲始終有一定限制，雖然在 Bose 聲學導流技術的加持之下人聲分析力及還原度都算幾好，不過大音量之下會稍稍受到高、低頻對清晰度的影響，另外單喇叭也做不到立體聲那種空間感和結像。用 Wi-Fi 以 AirPlay 2 播歌的分析力會比藍牙好一點，而且人聲、低頻的控制也較為優勝，藍牙會稍為鬆散一點，聽謝安琪女聲會幾明顯，另外低頻及不上 Wi-Fi 播放時結實乾淨。
Bose Portable Home Speaker 是市面上少有的便攜 Wi-Fi 喇叭選擇，而且比起同級對手好似 Sonos Move 再小巧便攜一點（雖然防水防撞能力就及不上後者）。比起之前幾受歡迎的 Revolve+，今次 Portable Home Speaker 音質方面有小升級，而且加入了相當實用的 Wi-Fi 功能，的確值得畀多幾百。AirPlay 2、Spotify Connect 這類「大路」的串流功能都有，如果有埋 Chromecast 就更好。可以同其他 Bose 喇叭，包括藍牙型號組成組合播歌，開 party 好實用，亦都適合想喇叭拎去不同地方使用、隨便擺位都有唔錯效果的用家。
Specifications
Portable Home Speaker
無線連接：Wi-Fi、藍牙
音樂串流：AirPlay 2、Spotify Connect、TuneIn
電量：12 小時
體積（連放下手挽）：191.5 × 119 × 104mm
重量：1.06kg
售價：$2,999
查詢：Bose（2123 9000）
SPILL Paper 電子通訊，為你送上電郵限定的精選新聞，以及不同欄目的深度報導，評測、觀點、專題，包羅萬有。立即按此訂閱。
