【視聽展 2018】熱潮更勝往年　影音新品亮相人頭湧湧

2018年08月11日

一年一度 8 月的視聽展又同大家見面，今年當然繼續假灣仔會展舉行。講起 AV Show，今年加埋耳機展，真係好多展覽。以為會攤薄了人流？咁就大錯特錯，今年的人潮似乎比起以往幾年仲要厲害，加上幾部大家期待已久的新機有得即場試，可以話到處都係排隊試機的人龍，會場入面由試耳機、試 Hi-Fi 到家庭影院的不同試音室、示範廳都幾乎座無虛席，真正人山人海。

熾
文迪

今年 AV Show 的人潮似乎比起以往幾年仲要厲害，加上幾部大家期待已久的新機有得即場試，可以話到處都係排隊試機的人龍，會場入面由試耳機、試 Hi-Fi 到家庭影院的不同試音室、示範廳都幾乎座無虛席，真正人山人海。

期待已久的新機亮相試睇試聽

每年 AV Show 都有不少品牌會趁這個時間帶新機同香港的用家見面，今年都不例外。大家期待已久的 Pioneer UDP-LX500 UHD Blu-ray 機今次在主場館的 Asia Theater 展區可以見到，而且最重要係有得「試睇」！據聞新機最快都要下個月先見街，有得率先睇吓效果，機會真係不容錯過。另外，通利琴行今年特別在主會場搭建了影音房，就係為了迎接最新推出嘅 RX-A80 系列 A/V 擴音機。配備了全球首創的 Surround:AI 技術，將人工智能引入到環繞聲效處理當中，Yamaha 的 DSP 一向都備受讚譽，今次再有新突破，到底效果係點？好值得大家現時（排隊）去試睇試聽。

一開場就梗係即刻去 Hall 3 Asia Theatre 睇吓期待已久的 Pioneer UDP-LX500 的真身。

今次並唔係「齋擺」無得試，現場有得試睇（無得試聲），不過場地不大，所以好快就已經逼滿人。

通利琴行今次特別在 Hall 3 另外搭建了一個試音室，裝潢同樣好「突出」，房上面真係有部立體的 RX-A3080！

AV Show 入面的影音示範一向都好多捧場客，Yamaha Surround:AI 試音房外無時無刻都大排長龍，建議有興趣試聽的朋友要早一點去這裡霸定位了。

現場以最新旗艦 RX-A3080 配合 7.2.4 聲道作最新的 Surround:AI 環繞聲處理示範，效果相當不錯，好值得一試。

通利琴行另一邊展房就同上年一樣有 NS-5000 的示範。

由以往的 D&M 到現在的 Sound United，除了品牌多了，連場區都一下子大了好多，今次都有不少 D&M 的新產品同大家見面。

Denon 快將推出的黑膠唱盤 DP-450USB，同 DCD-50、PMA-60 以及 Definitive D9 書架喇叭，組成一套十分合襯的「套裝」。

現場仲展出了 Marantz 限量版的 SA-KI Ruby CD 機同 PM-KI Ruby 合併機。

現場仲有一系列 Denon 的兩聲道新機，包括 PMA-800NE 合併機、DCD-800NE CD 機、DNP-800NE 網絡播放器，主攻入門市場。

展區另一邊就有 Polk Audio 及 Definitive Technology 展出，Polk Audio 的 Signature 系列座地喇叭在如此開場的環境之下低頻依然好充沛，表現相當不錯。

大昌的 Hall 3 展房就有 Tannoy Legacy Arden、Teac NR-7CD 等的示範。

行 AV Show 最開心梗係見到院長，AV Hospital 繼續有抵玩又靚聲的配件、器材同 CD 發售，現場仲有 XAVIAN 座地喇叭、soulines 唱盤和 Balanced Audio VK-33 前級示範。

人頭湧湧逼爆試音房

今年 AV Show 格局同往年相似，三樓 Hall 3 係最大的主場館，二樓同四樓就係示範房。主場館最左邊係軟件區，朝早到去邊度最多人？無錯，CD、黑膠、Blu-ray 同 UHD Blu-ray 銷售區就係人流最多的地方之一。中間區域由早幾年開始已經被耳機以及便攜音響佔據，亦都係最多試機位的地區。另外，往年開場之後一兩個鐘主場館外面排隊的人潮都會有少少減退，今年就比較誇張，起碼阿熾行過幾次見到都一直係大排長龍。場館入面當然都人頭湧湧，好似 Sound United 今次擺放的大型示範區，由於係開放式設計所以雖然人流好多，但係起碼仍可以較為鬆動地睇新機、聽示範，二樓同四樓的展房就「十室九 Full」，好多時連影相都無位影。