我想，如果你從來就沒有聽 Shine 的音樂的話，也許不會想到，獨立發展後的徐天佑，會以唱作人的身份示人。

其實，就算有聽 Shine，都未必估到。因為唔係講緊寫一首半首歌，而是，幾乎包辦整張 EP 的作曲部分。即將推出新碟《Thank You》的天佑，EP 內的 6 首歌，有 5 首由他親自譜寫。事實上，剩下的那一首，主題也是他構思的。

當年的青春偶像，如今 30 多歲，成熟了，推出專輯會抒發自己的生活感受、表達所思所想，不只為了「流行」。跟他做訪問，也發現他的思路十分清晰，很有自己的想法。

聽 Metal，玩電子音樂

徐天佑不是到獨立發展時才開始創作的，早在 Shine 推出第一張專輯《電影男孩》時，他已有參與作曲、編曲，當中〈去吧！旺角揸 Fit 人〉就是他與 James Ting 合寫的。

編曲都做埋？沒錯，不說不知，天佑在 Shine 出道之前已有玩電子音樂，〈去吧！旺角揸 Fit 人〉的音樂底就是他的創作成果（再交由 James Ting 加工），也因為要放在專輯，本來沒有流行曲創作經驗的他，便嘗試寫起旋律來。他自知倉底一堆電子音樂創作難以放在 Shine 的專輯上，於是開始寫更多旋律，「因為詞又唔係自己寫，編曲又唔係，咁樣會同自己嘅距離好遠」。天佑不想只當一個演繹者。

問他平時聽甚麼音樂，答案嚇你一跳。「其實我本身好鍾意聽 Marilyn Manson，即係 Metal 啲嘅嘢，但我有時又會 180 度反轉，聽好多 Classical，平時創作就以電子音樂為主。」相當古怪，亦好精神分裂。

#徐天佑個人創作專輯

及至他寫的旋律，也帶點詭異風，「我諗啲 melody 可能唔係好押韻，好似〈史上最遠離家出走〉，阿 Y（Wyman）話呢首歌係佢第二定第三次唔堅持每句都要押韻嘅歌，係撞出嚟嘅，因為個 melody 可以咁做。可能因為我寫歌比較個人，無諗乜商業價值。」

〈史上最遠離家出走〉早於 2016 年中已經派台，再早一點還有一首〈密陽〉，至今已有 3 年時間。而推出專輯的念頭，更可追溯至 2013 年，時間綫再推前 3 年。「嗰時啱啱做完 Shine 紅館 concert，好似有啲嘢完成咗咁，我覺得係時候做一啲個人啲嘅嘢，於是 2013 年底就開始同監製傾，同時又繼續寫吓歌。」#徐天佑個人創作專輯這個 tag，絕對是長時期思考與沉澱才能得來的。

天佑說，那時候做歌做得好慢，因為錄音花了很多時間，「監製問我係咪好趕住出，我話其實唔係，嗰時諗住畀兩年時間自己。其中〈史上最遠離家出走〉因為想配合返飄飄地嘅感覺，個 key 推到好高，錄咗成個禮拜，大家都覺得唱得好勉強，但又唔想降 key，於是就搵咗老師學唱歌，自己又再去練吓。」

結果一練就幾個月，進步是有的，當然不至於脫胎換骨，但新錄的版本大家都較為滿意。監製又問他，是不是很想表現自己唱功有幾勁？「我話我從來無諗過唱功，我唱歌都係著重個感覺，佢就話：咁就唔好過份追求個高音有幾靚啦！」更從心而發的唱，一切反而更加順利。

3 年又 3 年

從萌起推出專輯的念頭，到推出派台歌〈密陽〉和〈史上最遠離家出走〉，再到今天推出專輯，3 年又 3 年。另一個 3 年，主要是構想專輯的主題。「我係想講由內心好灰暗、心態好悲觀，到搵到愛嘅過程，但我又唔係絕望到要死咁，只係當時香港經歷緊一啲嘢，我嘅人生又經歷緊一啲嘢，令人好想逃離。」

從〈密陽〉、〈史上最遠離家出走〉到〈我們不期而遇〉，我們看到了從沒有光、逃離到外太空，到找到愛的過程，這個佈局早已定好了，問題是怎樣包裝呢？從暗到明，關鍵在哪裡呢？最後天佑想到「Thank You」。「我本身唔係咁悲觀，唔知點解踏入咗，但我覺得你一定要走返出嚟，而走出嚟係有好多方法。以前聽人講感恩會覺得好老套，好似得個講字，但諗返自己入行學嘅第一句說話，其實就係 Thank You，公司教見到茶水阿姐、服裝部嘅同事，即使只係遞少少嘢畀你，都要講 Thank You。以前覺得係例行公事，但人愈大就愈明白，人人都好辛苦，唔係得你辛苦。你咁諗嘅時候，就會得到好多嘢。」

《Thank You》從〈求〉這首歌展開，林夕的詞講述一個有點抑鬱的人，在這個世界追追趕趕，卻發現很多事情未如所願，「林夕話首歌同張國榮〈追〉、林憶蓮〈願〉係同一系列，所以歌名都係單字」。接著〈密陽〉、〈史上最遠離家出走〉兩首較 dark 的歌後，節奏明快的〈新浪漫〉成為了一個大轉折，從憤怒中得到一點領悟，最後再以〈我們沒有不期而遇〉及〈不只你一個〉作結，告訴你世界仍有愛。學會由衷感謝身邊陪伴過你、幫助過你的人，一切難題亦能迎刃而解，但首先你要用心體會，解決問題的關鍵始終是你自己。

是音樂，也是玩樂

《Thank You》EP 有 6 首歌，編曲人的陣容很厲害，Janet Yung（翁瑋盈）、李端嫻、何山、Jerald Chan、徐繼宗和溫翰文，每首都不同，連填詞人也一樣，6 首歌 7 位填詞人，包括林夕、林若寧、黃偉文、小克、林寶、藍奕邦和陳詠謙，可以說當今最火熱的名字都給網羅了。難怪問起天佑還有甚麼音樂人想合作時，他答到「未合作都想合作吓，特別是填詞人，佢哋真係好犀利，唔係咁簡單」。

其實天佑也試過親自填詞，早幾年 Shine 的〈茶餐廳〉，就由他包辦曲、詞、主唱，題材也十分個人，可以說是《Thank You》的前奏。他大概也因而領會到，填詞真不是一項容易的工作。〈史上最遠離家出走〉本來他也寫了一稿，後來才交給 Wyman 修改，「佢寫得更加盡，改到逃離咗就唔返嚟！」

昔日是青春偶像，如今推出「徐天佑個人創作專輯」，轉變很大，問他怎樣看自己現時在樂壇的定位，他說沒有想過。「我只係覺得想做就去做，唔好諗咁多嘢。以前覺得頒獎禮就係成績單，我覺得而家做音樂係因為需要做、覺得有趣、自己有嘢想講。」他說只想盡力推廣自己的音樂，其他的事不會想太多，「我唔知啱唔啱，我覺得唔好去諗任何人鍾唔鍾意，做咗出嚟就唔好後悔，因為呢樣嘢係由個人出發，反而做咗一啲唔係你諗法嘅嘢，呢樣先至係遺憾囉！所以係應該想做就去做，有人鍾意你嘅歌就會走埋嚟。」

他也有拍電影、做舞台劇，每次都好緊張自己的演出，壓力不小，「但呢個追求擺喺音樂度可能寫唔到嘢出嚟」。所以，音樂於他而言，是一種玩樂，「試過有兩日假，我走咗去寫歌！」放假會做的事，大概就是真正喜歡的事吧？即使拍戲時，天佑也離不開音樂，「之前同 Hanjin（陳奐仁）拍戲，都有傾吓音樂，嚟緊都會同佢 crossover 一下，會做啲再另類啲嘅嘢！」嘩！好令人期待！

緊貼最新音樂資訊，請讚好/追蹤 SPILL 旗下的「Overflow 音樂滿瀉」Facebook 專頁及 Instagram 帳戶。