耳機設計

可換殼充電盒任意配搭

今次 Thecoopidea BEANS+ 繼續保持了以往比較時尚同色彩悅目的設計，令耳機不只是男士專利，女士們都啱用。提供了黑、白及粉色選擇，今次重點除了耳機之外仲有充電盒，採用了可換式盒蓋，三種顏色有三款圖樣風格的面蓋，可以讓用家隨心情配搭。耳機配備了藍牙 5.1 技術，增加了連接穩定性，由充電盒取出就可以自動連接。具備 IPX4 防水規格的防水濺設計，淋到雨都唔驚。續航力就增加到 7 小時，亦提供 100 小時的備用時間，算係「長氣」。充電盒內置的 1,300mAh 電量亦足夠為耳機提供額外 10 次的完整充電，仲有 USB 輸出端子，用來應急幫手機充吓電都可以。

佩戴感

超輕身入耳設計

BEANS+ 同上代的 BEANS 一樣採用了超輕身的設計，每隻耳機只有 5g，戴落的確無負擔。耳膠本來以為會太細，不過實際用落都幾貼耳。可能因為耳殼內側部分因應亞洲人耳窩大小而設，弧度剛剛好，令到耳機好「入耳」，所以小耳塞都好 fit、戴得好穩，而且做到一定隔音效果，另外小耳塞也照顧到女性用家的需要。另外，揭開少少磁吸外殼就識得固定位置同露出充電盒端子，設計幾有心思。

音質表現

音色清新稍缺低頻

BEANS+ 的三頻表現算是平均，聽流行曲同小品音樂都幾適合。人聲較為突出同埋身，低頻量感不算多，有一定衝擊力，不過聲音取向仍是清爽為主，比較適合不太偏好低音的用家。分析力不算特別強，不過整體仍算清晰，還原度幾好，不會有矇聲、焗聲的情況。高音表現不俗，女聲、弦樂等都呈現到那種纖幼質感。

總結

有聲都要有樣？

的確，真無線耳機已經流行了一段時間，市面上的選擇也相當多，不過主要仍是音質或者運動作為主打。BEANS+ 睇準的就是潮流以及女性市場，可以用比較實惠的價錢買到一對靚仔、充電盒又有得換殼、音質又唔錯的真無線耳機。尤其戴口罩的時候用真無線真係方便好多，日日戴出街都適合，BEANS+ 以入門價來講音質相當不錯，最重要係設計靚仔，除了男士之外，相信女士們都會鍾意。

Specifications
BEANS+
顏色：千禧粉、耀岩黑、奶酪白
耳機類型：真無線
無線連接：藍牙 5.1
單元：6mm 動圈
頻率響應：20Hz 至 20kHz
防水等級：IPX4
連續使用時間：7 小時連續播放（56 小時額外電量，100 小時待機）
充電時間：1.5 小時（耳機）、3 小時（充電盒）
重量：5g（每隻耳機）、89g（充電盒）
售價：$699
查詢：thecoopidea.com

緊貼最新資訊，請讚好 SPILL Facebook 專頁。