【評測】小米投影儀青春版：配備 Android 的輕巧多功能全高清投影

可能香港的用家都不太習慣「青春版」這種命名方式，小米投影儀青春版大概可以解讀做「Lite Version」輕怡型號，因為小米仲有幾款較高階投影機。今次測試的算是入門型號，雖然機身幾輕巧，但係都配備了 1080p 的解像度，加上運行 Android 系統，在使用上應該幾靈活方便。今次就實際試吓投影效果係點，3 千元的全高清投影係咪抵玩？安裝、應用方面又有咩要留意？

機身設計

比預期輕巧、內置喇叭兼接駁幾齊全

開箱小米投影儀青春版之後發現比預期中細部，15cm 的高度大約和小型書架喇叭差不多，1.3kg 的機身幾輕便。而且機身內置喇叭，一體式大音腔設計，提供 5W 輸出，聲壓最高可達 72.6dB，實際用落幾夠聲，大約 100 呎左右空間都夠用。端子集中在機背，有 HDMI、USB 2.0 和耳機端子，基本接駁都算齊全。電源接線就稍為短了一點，連接方面有少少限制，大機會要用延長拖板駁電。

可能香港的用家都不太習慣「青春版」這種命名方式，小米投影儀青春版大概可以解讀做「Lite Version」輕怡型號，因為小米仲有幾款較高階投影機。今次測試的算是入門型號，雖然機身幾輕巧，但係都配備了 1080p 的解像度，加上運行 Android 系統，在使用上應該幾靈活方便。今次就實際試吓投影效果係點，3 千元的全高清投影係咪抵玩？安裝、應用方面又有咩要留意？

投影鏡頭位於機身側上方，投影的角度會稍為斜向上，所以平放檯面的話依然可以完整投影到畫面前上方的牆身。

內置喇叭設計，投影機兩側下面的開孔用來出聲。

機身後面是散熱孔，開機無耐就會有少許熱量，運行約 1 小時之後都會稍稍「暖手」，不過未至於太熱，而且散熱噪音不大，不影響觀影。

規格及功能

1080p 加 Android 播片夠方便

小米投影儀配備了 0.33 吋 DLP 投影晶片，具備了 1,920 × 1,080 的全高清解像度。DLP 技術加持之下亮度不錯，有 500ANSI。Amlogic T968-H 的 CPU、2GB RAM 的規格不算很強，不過用來睇全高清片都綽綽有餘。8GB 的內置容量擺片就稍為不足，而 USB 也只支援 2.0，所以比較適合用 NAS 或者 YouTube 等串流方式來睇片的用家。Android TV 平台可以安裝的播片軟件幾多選擇，加上可以用 Chromecast、Miracast 功能以「投映」方式來播片，所以仍算相當方便。

機頂就只有一個開機按鈕，主要操作可以通過遙控進行。

遙控幾簡潔，方向、音量以及 Android 快捷鍵有齊，而且支援語音輸入作搜尋，廣東話都可以。

機身前面設有自動對焦感應器，對焦幾靈敏，大約幾秒鐘可以完成。

端子集中在機背，有 HDMI、USB 輸入以及 3.5mm 耳機輸出，最左側係電源端子。

跟機電源都係白色，加埋投影機身同遙控襯得幾靚，不過電源線比較短，可能要用拖板駁長先啱用。

機底設有 1/4 吋螺絲孔，可以安裝到腳架使用。

設定及安裝

Android TV 夠方便、有線加定焦安裝有限制

投影儀的設定方式與普通 Android TV 差不多，雖然幾方便但係稍為花時間。內置了 Google Play 可以安裝 Android TV Apps，數量上同 Android 手機當然有距離，不過好多影片、串流播放器都有。雖然缺少了 Netflix，不過依然可以通過手機以 Chromecast 方式投放。

主介面就係好熟悉的 Android TV 選單介面，可以預覽一些影片內容。

阿熾常用的 VLC Player 都有得直接經 Google Play 安裝，部分 Android 手機 App 都可以適用。

自動對焦鏡頭用落幾方便，稍為移動一下機身就會自動檢測進行自動對焦，而且準確度幾好。可惜梯形校正只支援上下方向，即係打側投影的話畫面就會扭曲，只有 tilt 上下先有得修正。加上採用定焦鏡頭，只能夠通過擺投影機遠近來調節畫面大細，所以安裝方面會有一定限制，當然簡單投落牆身睇片都問題不大。

自動對焦的輔助畫面，大約幾秒就可以完成自動對焦程序。

設定選單的項目就主要分為 Android 系統以及投影機兩部分。

支援接駁藍牙配件，無論用藍牙手柄或者耳機都可以。

梯形校正、正投反投、圖像模式等基本設定都有齊，可惜梯形校正只支援上下方向，有埋左右的話會實用好多。

標準、電影、鮮艷、運動以及用戶共 5 種圖像模式，標準模式啱睇電視、電影就啱用電影，其他兩個模式顏色都稍為偏差較多，不太建議使用。

基本的亮度、對比、飽和度、色溫等的畫面設定都有齊。

畫質測試

清晰細緻、色準稍不足

用小米投影儀以 YouTube 播放、Chromecast 投映以及 HDMI 輸入播 Blu-ray，畫面解像度方面好唔錯，投影大約 60 至 80 吋畫面都仍然相當清晰。其實再放大都可以，不過稍為有現場光的話，投影亮度就開始稍為不足，全黑環境的話過百吋都仍然夠光。得益於 DLP 的快速反應，所以播放動態畫面都好流暢，不過也是因為 DLP，所以會有少許彩虹效應，眼睛敏感的朋友會較易睇到色紋。

睇張敬軒演唱會，黑位稍為黐地，不過整體光影反差效果唔錯。睇《小丑》這類調色比較重手一點的電影，色彩飽和度都算足夠。畫面稍為有點偏色，不過也是這類小型投影機常見的情況，睇《寶貝神車手》就明顯會見到人面膚色稍為偏紅，色階過渡唔算順滑，不過整體細緻度在追車的快畫面之下仍然保持得到。

總結

三千元全高清 + Android 算抵用

小米投影儀青春版有齊全高清解像度以及 Android TV 系統，功能幾豐富。尤其這類小型投影機最缺少的其實係訊源同接駁選擇，小米投影儀有 HDMI 有線接駁，可以插 USB 播片，通過 Chromecast 以及由 NAS 或者其他串流平台播放都可以。雖然畫質只算中等，不過仍有全高清的細緻度，整個配套算係好完善。以三千元左右的售價，對於想在家居、房間玩吓投影的用家算幾抵用。唯一係要留意安裝或者擺位，因為定焦設計、梯形校正等限制，想投影到理想畫面要落少少功夫。

Specifications
小米投影儀青春版
投影晶片：0.33" DMD
解像度：1,920 × 1,080（支援 HDR 解碼）
亮度：500 ANSI
鏡頭對焦：自動
梯形校正：垂直校正
投射比：1.2
投影尺寸：40 - 200 吋（推薦尺寸 60 - 120 吋）
CPU：Amlogic T968-H
RAM：2GB DDR3
ROM：8GB iMMC
系統：Android TV 9
無線傳輸：Chromecast、Miracast
連接：2.4G/5G 雙頻 Wi-Fi、HDMI、USB 2.0、3.5mm 耳機
體積：115 × 150 × 150mm
重量：1.3kg
售價：$3,399
查詢：小米香港（3001 1888）