「W」for Waterproof！　支援 IPX7 防水規格

X-mini 之前已經有 XOUNDBAR 及 KAI X1 兩款好受歡迎的藍牙喇叭仔，今次的「W」版本就是「Waterproof」版。配備 IPX7 防水規格，可以放入 1 米水深使用 30 分鐘，尤其夏天就到，好適合沙灘、泳池甚至沖涼時聽歌使用。除了防水之外，更加入多個針對戶外使用的設計，防水外殼物料非常容易清潔，用水一沖就可沖走沙泥等污垢。機身底部設有相機用 1/4 吋螺絲位，方便透過配件固定在單車等不同地方，用途更廣泛，可以話周末郊遊、野餐、BBQ 一樣可以大派用場。而為了配合戶外造型，兩款喇叭都提供鮮藍、橙紅、白色撞幻彩紫藍色機身選擇，幾型格搶眼。

XOUNDBAR W：一體式迷你立體聲

XOUNDBAR W 就同個名所講一樣，是一隻迷你「SOUNDBAR」形喇叭，長條形設計內已經配備了兩組 36mm 單元，一體機身但就提供到立體聲輸出。每邊單元提供 3W、總共 6W 的輸出功率。相當適合沙灘或者在露營聽歌，如果想要更強勁音效，就可與同款藍牙喇叭無線配成一對使用，提升輸出。

KAI X1 W：小巧強勁仲可配對立體聲

KAI X1 W 採用圓形小巧機身設計，與普通版的金屬機身不同，防水版採用了彩色膠面設計，比較可愛搶眼。配備了 50mm 單元，輸出功率加大至 5W，以小型喇叭來說音量幾充足，低頻亦都更強勁。向上發聲的設計聲音擴散性會更好，適合朋友圍在一起露營、野餐、傾偈時使用。另外亦都可以同另一隻 KAI X1 W 無線配對使用，進一步加強音量，仲提供埋立體聲效果。

音效測試：小喇叭大音量　不同場合都適用

今次先試 KAI X1 W 這款小巧圓形喇叭，一如所料，同 X-mini 其他小型喇叭一樣，雖然機身細細但音量十分大，甚至百幾呎空間都夠聲。室外用的話效果亦都好唔錯，向上發聲的設計擴散性好強，的確幾適合派對、聚會等場合使用。另外在大音量之下都沒有拆聲的情況，不過始終喇叭比較細同輕身，大聲之下有少少諧振，聲音就不及中高音量時那麼清晰。低音未至於好強，不過以小型喇叭來說都幾令人滿意。

至於另一款的 XOUNDBAR W，雖然功率再大一點，不過始終只係 6W 同 5W 的分別，所以音量其實同 KAI X1 W 相差不遠，稍為大聲少少，以小型喇叭來說同樣係「大聲公」。兩單元的設計有一定的立體聲效果，不過始終兩個單元貼得比較近，所以離遠聽的話就同單聲道分別不大。要有比較強的立體聲效就真係要配對多一隻喇叭。XOUNDBAR W 有得直接穿繩方便周圍拎，不過擺檯面就最好聲，純粹吊住的話音量會細一點，不過分析力又好一點。擺水入面的話兩隻喇叭都識浮起，不過浸過水之後聲音會稍為矇少少。

總結：夏日郊遊聽歌良伴

X-mini 的迷你藍牙喇叭一向都小巧又大爆發力，今次兩款防水藍牙喇叭都唔例外，XOUNDBAR W 同 KAI X1 W 都係現有熱門型號加入了防水功能，更加適合戶外使用。四、五百元的售價，豐富的顏色選擇鮮艷易襯，掛在背囊、手袋，無論係秋夏郊遊、或者水上活動用來聽歌都好唔錯。

Specficiations
XOUNDBAR W
單元：36mm 單元 × 2
輸出功率：3W × 2
藍牙：藍牙 v4.2（支援 A2DP、AVRCP、HFP、HSP）
接收範圍：最長 10 米
續航時間：最長 8 小時
其他功能： 無線立體聲喇叭功能（只限配對 XOUNDBAR W）
體積：121mm × 21mm × 48.5mm
重量：137g
售價：$399

Specficiations
KAI X1 W
單元：50mm 單元
輸出功率：5W
藍牙：藍牙 v4.1+EDR（支援A2DP、ACRCP、HFP、HSP）
接收範圍：最長 10 米
續航時間：最長 8 小時
其他功能：無線立體聲喇叭功能（只限配對 KAI X1 W）
體積：80mm × 40mm
重量：145g
售價：$499
查詢：Soundwave（2771 8209）

緊貼最新資訊，請關注 SPILL 的 MeWe 專頁、Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。