如果大家未睇《忘形水》，好建議大家花少少時間睇一睇這套好精彩的「成人童話」。未睇 UHD Blu-ray 版之前，阿熾可能建議大家睇 DVD、Blu-ray 或者其他版本都無所謂，不過睇過 UHD Blu-ray 之後，真心覺得對於有兼容播放機的用家來說，是好值得收藏 4K 影碟版。原本以為係低成本製作、靠故事取勝，但睇過之後發現，由色彩、燈光、音效到音樂等各方面都極之出色，甚至是近期最值得收藏的影碟之一。

美妙的色彩、構圖與運鏡

大家要留意《忘形水》係一套三級片，裡面有好幾幕性愛鏡頭，隱晦、露骨、浪漫都有，可能比較適合「午夜場」收看。不過並不是因為這些三級場面，所以《忘形水》先至叫做「成人童話」，而係因為故事本身就有齊童話的元素：人魚、拯救、報恩等等，不過裡面有好多設定都與童話「相反」，人魚係男主角，仲有不太漂亮而且步入中年的女主角。開場幾幕介紹女主角的引子，畫面已經十分吸引，由水底的藍色，到室內的黃色、室外戲院的橙紅色、等車時的綠色⋯雖然電影充滿懷舊風格，但用色極之豐富動人。另一樣十分令人讚賞的是燈光效果，電影裡面大部分都是室內和夜間場景，可以話每一個場景的光影設計都極之立體，加上出色的構圖同運鏡，比起好多大製作做得更好，值得睇戲的時候留意一下。

水面、水中、水底音效有齊

水聲算是平時做測試最喜歡試的聲效之一，今次《忘形水》入面就有齊各種各樣不同的「水場景」。雖然《忘形水》影碟得 DTS-HD MA 5.1 音效，不過製作方面做得相當仔細，中後段博士雨中被殺一幕、兩個主角在注滿水的浴室一幕，水聲的質感和包圍感都十分出色，雖然沒有 Dolby Atmos 的天花聲道，不過都足夠令人投入。另外，電影入面有不少出色的配樂，最初頭一段電視裡面同電視外面的「樓梯舞」就已好令人坐唔住、想跟住跳（無錯，《忘形水》係奪得奧斯卡最佳原創音樂），電影由頭到尾都穿插住相當浪漫動人的配樂，美國女高音 Renée Fleming 特別重新獻唱 1943 年奧斯卡最佳電影歌曲 Alice Faye 的經典〈You'll Never Know〉都在其中，係十分值得一「聽」的影碟。

播放器材

電視：Sony Z9D 65 吋
UHD Blu-ray 播放機：OPPO UDP-205
擴音機：Onkyo TX-NR676E
5.1.2 喇叭：B&W 600 S2、Q-Acoustics 7000

影碟資料

電影公司：霍士
片種：科幻
導演：吉拿域戴拖路
演員：莎莉賀堅絲、奧緹華史賓莎、杜鍾斯
語言：西班牙語、英語、法語、德語、意大利語
音效：英語 DTS-HD Master Audio 5.1、Dolby Digital 5.1 等
字幕：英文、繁體中文等
特別收錄：預告片、解構《忘形水》：前奏、解構《忘形水》：舞步、《忘形水》的誕生
視頻壓縮：HEVC
容量：UHD66 + BD50
解像度：3,840 × 2,160 (4K)
影像：彩色
級別：III

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。