全透明外殼型格設計

ONEclassic 最特別的地方是採用了透明的喇叭箱身，單元同裡面的電路板等部分都一覽無遺，唔講音效，淨係視覺衝擊力都夠晒強。採用了德國製的透明阿加力板作為箱身，比普通木製音箱更加結實。配備了 2 吋絲質半球頂高音單元同 6.5 吋紙盤低音單元，頻率響應為 65Hz - 38kHz，輸出達到 120W。由於係無線設計，所以喇叭只需要接駁電源線，ONEclassic 會附送一隻發射器 USB 手指，可以直駁用响 Windows 同 Mac 電腦，又或者通過 OTG 線用落智能手機都得。

零時差、低干擾的 DECT 無線技術

大家平時聽開的「無線喇叭」，一係就講緊藍牙喇叭、一係 Wi-Fi 串流、AirPlay 喇叭，兩種技術都有聲音延遲、左右聲道不能精準同步的問題，所以多數用於入門級的多媒體喇叭。今次 ONEclassic 用的 DECT 無線技術最特別之處是少了藍牙同 Wi-Fi 的聲音延遲，左右聲道可以 0.5 微秒同步一次，達到幾乎零時差的同步以及減少 jitter 的情況。而準確的左右聲道可以令音色更準確自然之外，音場同聲音結像亦可以更加好。而 DECT 另一個好處是採用了 1.9GHz 的高抗干擾性專用頻段，响現時充斥住 2.4GHz 訊號的環境之下，音訊傳輸可以更穩定，而且傳送距離都仲有 50 米，遠高於藍牙的 10 米，雖然少過 Wi-Fi 的 100 米，但室內使用已經相當足夠。

無線音樂播放測試

樣幾靚都好，喇叭要好聲先係王道，尤其呢對 ONEclassic 係 Hi-Fi 取向，以一對 ONEclassic 就取代了前後級、訊號線再加喇叭，究竟無線播放之下音質可以達到咩程度？今次就以 16bit/44.1kHz CD 質素播放幾首音樂來試下。

人聲測試：定位超準同結像清晰

先用張學友試一試人聲效果，不得不講一開聲幾有驚喜，因為人聲立體感好好，定位同結像更加係極之清晰，簡直係有人企响前面演唱一樣，DECT 無線技術的精準音訊傳送的確有料到。人聲還原力都唔錯，可以呈現到學友略帶磁性又有厚度的聲線，而且音樂感都相當好。唯一係人聲同配樂的分離度稍稍不足，去到部分副歌、激鼎的段落背景音樂會有少少蓋過主唱，令人聲唔夠突出。

樂器測試：三頻平均、分離度稍不足

之後再試聽下交響樂，ONEclassic 呈現呢類柔和同激昂兼備的樂曲時表現幾好，高音可以去得夠盡但柔順唔刺耳，另外三頻的表現都相當平均，聽 Classical 幾適合。未知是否 DECT 的頻寬限制，帳面上係 480kbps、配合升頻可達 24bit/96kHz，但分析力去到多種樂器同時演奏配合時會稍稍下降，影響了各自的立體感。低音方面，量感同力度就十分足夠，甚至可以做到少少座地喇叭的「氣勢」，偏中性但相當有衝擊力，其呢方面比起普通書架喇叭尤為出色。

不同音樂 Profile 測試：保持質素之餘可玩性極高

最後就用 Sukie 試一試唔同的 Sound Profile，ONEClassic 有 Warm、Natural、Clarity 同 Dynamic 4 個選擇。Natural 可以做到三頻比較平衡的效果，之前主要都係用佢試；Warm 就模擬膽機效果，自己一向唔太喜歡呢類偏暖偏慢的音感，但係 ONEClassic 拿捏得幾好，增加了人聲的厚度、令 Sukie 把聲更加甜美溫潤之餘，又不失分析力，值得一讚，就算聽慣「數碼聲」的人都應該會覺得幾討好。而最重要係呢類 Sound Profile 係通過更改增益、濾波同分頻等等參數來達成，唔似係改 EQ 出來嘅音質。

總結：靚聲都可以 Made in HK

如果話透明、無線都仲唔夠特別的話，ONEclassic 最特別之處就係由香港品牌 ONEaudio 主理。筆者自己都估唔到本地品牌可以設計出咁有型同靚聲兼備的喇叭產品，除了 Hi-Fi 取向之外仲有結合無線技術。雖然使用上就唔夠普通 Wi-Fi 喇叭方便，但係音質就好好多，對於玩開 CAS 的用家來說值得考慮。

Specifications
ONEclassic
輸出功率：120W/Ch
頻率響應：65Hz - 38kHz
體積：200x350x285mm
重量：10.5kg（每隻）
售價：$28,500（一對連發射器）
查詢：ONEaudio（2713 0824）

緊貼最新資訊，請讚好 SPILL Facebook 專頁。