自動飛甩片頭、片尾
〈Netflix AutoSkip: Intro, Next Episode SKIP〉
雖然 Netflix 好多劇集片頭其實都幾好睇，不過唔想重複觀看的話，由劇集第 2 集開始就有得㩒「略過介紹」按鈕來跳過。這個 Extension 就可以幫大家自動按下「略過介紹」跳過片頭，除此之外，仲可以略過埋「查看工作人員名單」並按下「下一集」，跳到下一集播放，自動飛甩片頭同片尾，最適合馬拉松式煲劇使用。〈下載連結〉
網頁版 Netflix 更好玩？ 8 大實用 Plug-in 觀影體驗大提升
2020年04月03日
而家好多 4K 電視都內置 Netflix，加埋又有 Apple TV 4K 等等播放器，睇片有 4K 畫質仲有環繞音效，聲畫質素一流。經電腦用 Chrome 睇 Netflix 又無得校畫質，聲效又麻麻，不過最大優點和無可取替之處就係有好多實用、好玩的 Extension plug-in，篩選影片和學外語好方便，用超闊屏幕睇片甚至瞓响度煲劇一樣得。今次就同大家分享一下 Chrome 各種 Netflix 好用 plug-in，等大家睇戲煲劇嘅體驗大提升！最後還有 tips 等大家用電視睇都一樣享受到上述「福利」！
〈Netflix AutoSkip: Intro, Next Episode SKIP〉
想安裝 Extension 只需要在搜尋相關 plug-in，然後在 chrome web store 選擇「Add to Chrome」就可以。
右鍵點擊頁面上面不同的 Extension 標誌，選擇 Manage Extensions 就可以進入該 Extension 的管理介面，暫停使用或者捲到最底選擇移除都好方便。
Netflix AutoSkip：Intro, Next Episode SKIP 除了略過片頭之外，片尾都識得自動跳過，慳返手動點選略過的步驟。
•
影片評分速查
〈Film scores for Netflix〉
Netflix 的電影和劇集選擇實在太豐富，揀片有時會無從入手，因為如果純綷想「kill time」都驚揀著爛片變「waste time」。Film scores for Netflix 就可以在主介面的圖示上面顯示影片評分，評分來源包括 IMDB、The Movie DB、Nflix.pl 等等。因為 Netflix 其實都有唔少「伏片」，呢個 Extension 就可以作為一個揀片的參考。對英文介面支持比較好，有時中文片名會找不到部分評分，轉做英文就可以（載入評分之後再轉返中文都得）。〈下載連結〉
載入評分之後，就可以好方便地在主介面睇到每套片的 IMDB、TheMovieDB 等的評分，幫助用家減少中伏機會。
大家可以根據返自己習慣來選擇評分網站來源，不過好多網站對英文劇名、電影名支持比較好，如果出現找不到評分的情況可以暫時將介面轉去英文取得評分資料再轉返中文都得。
•
明確目標詳細分類
〈Netflix - Category Browser〉
Netflix 的影片分類其實唔算好清晰易用，好似亞洲、華語、劇情片等等其實都唔太幫到用家篩選想睇的片種。Netflix - Category Browser 就可以為整個影片庫做更詳細、清晰的分類，例如想睇恐怖片（Horror Movies）、入面再細選恐怖搞笑片（Horror Comedy）都可以，分類更加易用。比較可惜同樣係只有英文選單，不過片種其實來來去去都係嗰十幾類，揀揀吓就識。〈下載連結〉
點選 Netflix - Category Browser Extension 的標誌就可以叫出分類選單，常見的動畫、喜劇、劇情、音樂、恐怖片等大分類有。
揀好大分類之後就有得响下一個選單揀細分類，好似 Action 片種之下就有 Asian Action Movies、Adventures、Spy Action & Adventure 等等，分得好仔細。
•
睇 Netflix 學外語神器
〈Language Learning with Netflix〉
想快速學好外語，除了識一個外國男女朋友之外，最快的方法都莫過於睇劇。Language Learning with Netflix 就可以為 Netflix 的影片加上雙語字幕，支援的語言種類極之豐富，仲可以用 mouse 點擊獨立查詢單字（仲有埋讀音）、儲存字幕、每一句自動暫停、0.7 × 慢速播放等大家聽清楚讀音等等，輔助學習功能多到數唔晒，真係可以話係睇 Netflix 學外語神器。〈下載連結〉
LLN 支援的語音種類極之豐富，而且有各種快捷鍵可以暫停、跳讀、儲存字幕等等，對睇片學外語好有幫助。
點選字幕的某個單字仲有得獨立查字典同讀音，功能強大。
•
技術控必備 快播和畫面調節樣樣有
〈Super Netflix〉
Super Netflix 係一個多功能 Extension，網頁版 Netflix 本來只可以自動調節畫質，Super Netflix 就可以設定 bit-rate，而且可以在資訊頁睇到影片解像度、編碼、聲軌、碼率等等的資訊。此外亦都可以在 Netflix 畫面上外加預設畫面模式，甚至變做黑白畫面都可以。亦都可以外加 DFXP 字幕（可由 SRT 轉換），更加支援 0.5× 到 4× 的播片速度調節，想慳吓時間用 1.5 倍速煲劇都可以。〈下載連結〉
安裝好 Extension 之後畫面就有半透明選單，可以加入字幕、調節播片速度、查看串流影片規格，以及調節畫面模式；調節做 4 倍速再變做黑白片都仲得。
由 bit-rate、聲軌、影片編碼等等都可以在資訊頁面睇到，啱晒技術控。
•
擺脫煩人自動播放動態介面
〈Netflix Classic〉
Netflix 的主頁置頂影片會自動播放預告，另外只要移動 mouse 到影片上面亦會自動放大縮圖同播片，有用家會覺得方便，有用家會覺得煩厭。Netflix Classic 就會將 Netflix 的介面變做最傳統的靜態介面，想睇片就點入去，簡單直接，等大家可以擺脫有時幾煩人的動態介面。〈下載連結〉
開啟 Netflix Classic「模式」之後介面就會變成傳統靜態的一層層網頁，沒有煩人的動態頁面有時更易用。
•
超闊屏幕必備
〈Aspect Ratio 21:9〉
近年好多朋友的電腦 mon 都轉用了超闊屏幕，21:9 甚至 42:9 都有，用來睇 Netflix 的話有時就會出現左右留黑邊的情況。想用盡整個屏幕闊度，睇到超闊影片效果就可以用呢個 Extension。Netflix 仲好聰明識得將字幕調高至畫面內，所以唔會有字幕「跌出」畫面的情況。而且好多 16:9 影片都會預留一些上下同左右空間，所以就算用 21:9 闊屏幕睇都唔驚會睇少咗畫面內容。〈下載連結〉
平時用 21:9 之類的超寬屏幕睇 16:9 的劇集，全屏幕之下左右就會留低黑邊，用了這個 Extension 就可以好似上面一樣用盡全畫面（雖然會裁走少少上下部分）。
這個 Extension 仲可以支援 YouTube、Vimeo 等平台，可以選擇只在全屏幕之下運作，記得揀返 Crop/Zoom 模式，唔係就會左右拉長畫面了。
•
橫瞓煲劇無問題
〈Netflix Flip - Rotate Netflix in Your Browser〉
唔知大家平時喺屋企煲劇會係咩坐姿，如果想瞓响度睇都有「正常」畫面的話，就可以用 Netflix Flip 這個 Extension，除了支援向左、向右扭轉畫面之外，扭到傾斜甚至反轉畫面都可以，用 Notebook 擺床上瞓低睇戲就最啱。而且配合埋 AirPlay 等映射功能將畫面投影到電視的話，瞓响梳化都有「打直」的畫面睇。〈下載連結〉
根據自己的睇劇「姿勢」，打斜畫面都一樣可以，當然影像本身就會縮細了一點，另外無得一鍵重設返正常畫面，算係有少少不便。
有特別需要的話，甚至將整個畫面倒轉都可以。
後記：額外「秘技」
AirPlay、Chromecast 投影 Netflix 電視睇
無錯，用電腦或者 notebook 屏幕睇 Netflix 可以享受到上述 Extension 帶來的方便，不過如果仲想用埋電視來睇戲煲劇又得唔得？其實只需要通過 AirPlay 或者 Chromecast 功能，就可以將電腦畫面投映返去電視播放，用返大畫面睇都得。雖然部分功能，例如 Language Learning with Netflix、Netflix Flip 等等响 Chromecast 之下就無法運作，不過依然有得善用 Film scores for Netflix、Netflix - Category Browser 的方便揀片功能。
用 Chromecast 的話有部分 Extension 功能會用唔到。
其實上述 Extensions 都只係冰山一角，Chromecast 仲有好多類似或者更豐富功能的 Extension 選擇。另外，因為版本更新比較快，如果上面有些功能不能使用，其實都好易搵到代替品，大家可以到 Chrome Extension 主頁自己發掘一下，應該有唔少有趣驚喜新發現。
SPILL Paper 電子通訊，為你送上電郵限定的精選新聞，以及不同欄目的深度報導，評測、觀點、專題，包羅萬有。立即按此訂閱。
你可能感興趣的文章
