全面超越 AVR-X7200WA 的 13.2 聲道頂級旗艦
雖然家用版 Dolby Atmos 推出的時候,已經講明最多可以支援 34 個聲道(24 個地面、10 個天花),不過講得係「家用」,咁誇張的配置絕大部分人都唔會用到。所以即使近幾年 Dolby Atmos 都已經幾普及,但頂級機款最多都係 11.2 聲道,可以提供 7.2.4 或者 9.2.2 輸出。Denon 在今年初的 CES 上帶來的大驚喜,就是 AVC-X8500H 這部擁有 13.2 聲道處理及放大的合併 A/V 擴音機。阿熾寫呢部新機的時候都有個筆誤,就係跟返 Denon 近年命名的慣例寫做「AVR-X8500H」,其實今次新機係依據當年頂級旗艦 AVC-A1 的標準打造,連 Receiver(R)部分都刪除來減少干擾,所以命名都係跟返「AVC」而不是「AVR」。話說 Denon 旗艦機已經好耐無更新,最近最高階的機款 AVR-X6400H 雖然都有 11.2 聲道,不過依然有部分規格及不上 AVR-X7200WA,而今次 AVC-X8500H 除了擁有更多聲道之外,其餘所有規格同功能都有提升,已經全面超越上一代旗艦。