follow us
聽開音樂的朋友可能都有自己慣用的音樂格式，以前就多數係 MP3，不過近年就多了一些高音質的其他選擇，好似上個星期同大家介紹過的 Hi-Res 音樂格式 AIFF、WAV、FLAC、ALAC 同 DSD。雖然同時聽幾隻格式都冇問題，不過可以主要用一款的話，買歌、管理、播放都比較方便，究竟邊一種 Hi-Res 適合自己？今次就同大家分析一下，睇吓大家揀邊款會比較適合。
如果大家自己用 CD 轉歌的話，除了 DSD 之外，其他格式都有得轉，詳情可以參考「【SPILL教室】如何 rip 碟？ 輕易把 CD 轉為無損音樂檔案」。不過要留意，CD 轉歌只係 16bit/44.1kHz，並不是 Hi-Res。要聽 Hi-Res 主要靠買歌，咁現時買歌平台又多數用咩格式？WAV 這個傳統格式是主打，FLAC 則是較主要的無損壓縮格式，兩者多數都可以提供相同的檔案規格（例如 WAV 有 24bit/192kHz 選擇的話通常 FLAC 都會有）。
Hi-Res 音樂容量幾大、動輒就過百 MB，以一首 5 分鐘左右的音樂為例，CD 質素（16bit/44.1kHz）的 WAV、AIFF 檔案大約是 50MB，FLAC 同 ALAC 就大約 25MB（一半左右）。更高質素的 Hi-Res 音樂也是類似，24bit/96kHz 的 FLAC、ALAC 大約是 100MB，24bit/192kHz 則為 200MB，WAV 同 AIFF 兩款無壓縮格式都要一倍容量，而 DSD64 就約為 200MB、DSD128 就係 400MB。雖然現時大家電腦的 Harddisk 都夠晒大，不過當要擺相當大量音樂時都要考慮下容量問題，而習慣擺落 DAP、手機播放的用家，因為容量相對有限，無損壓縮的 FLAC 同 ALAC 會相對適合。
另一個要考慮的因素是兼容性，有時電腦播，有時 DAP 播，多個平台都兼容播放當然更加好。Mac 同 iPhone、iPod 的用家，播 Apple 主理的 AIFF 同 ALAC 都較為方便，原生就支援。不過現時播 Hi-Res 的平台好多，電腦、駁 DAC 解碼、DAP、甚至 CD 機、擴音機都可以播，講到兼容性的話依然係 WAV 最高，基本上絕大部分器材都支援。近年多了 DAC 同 DAP 播到 DSD，通常亦可以播埋 Hi-Res 的 FLAC、ALAC，反而 Android 同 iOS 的用家會麻煩些少，因為始終不是為播 Hi-Res 音樂而設，有時要付費買 App 先至播到。
當然，上述只是部分的考慮因素，實際上用家未必有得揀。例如某張 Hi-Res 專輯淨係得 WAV 買，要聽都係要買。又例如有朋友會比較鍾意 DSD 音樂較大的動態，雖然播放無咁方便，買歌時可能都會揀返 DSD。另外，WAV 雖然兼容性好，但係入 Album Art 等資料又比較麻煩。就算揀了一種格式，都有唔同的規格選擇，究竟 24bit/96kHz 定 24bit/192kHz 已經足夠？容量大了自己的系統又播唔播到分別？對於想試玩 Hi-Res 音樂的朋友，其實 2L Music、HDTracks 等網站都有免費的 sample 音樂可以下載，大家試聽下可能會更易揀到適合自己的 Hi-Res 音樂格式。
1. AIFF：無損無壓縮 Apple 版的 WAV
2. WAV：老而彌堅的無損音樂格式
3. FLAC：不可不知的無損音樂格式
4. ALAC：由 Apple 主理的無損音樂格式
5. DSD：SACD 的技術核心以數碼檔案方式浴火重生
