「從前我比較多用腦創作，現在更多是用心。」跟符致逸（Adrian Fu）做訪問，這是他令我印象最深刻的一句話。寫歌當然要用心啦，但我們卻不能否認，音樂創作也是一個融合理智和感情的過程。尤其從小就學音樂的人，腦袋裡充滿著各樣理論，總希望能在既有秩序中尋求突破；然而太過理性，情感也許會有給削弱的可能，如何平衡就成為了關鍵。
「從前我比較多用腦創作，現在更多是用心。」跟符致逸（Adrian Fu）做訪問，這是他令我印象最深刻的一句話。寫歌當然要用心啦，但我們卻不能否認，音樂創作也是一個融合理智和感情的過程。尤其從小就學音樂的人，腦袋裡充滿著各樣理論，總希望能在既有秩序中尋求突破；然而太過理性，情感也許會有給削弱的可能，如何平衡就成為了關鍵。
譬如他會告訴你，新歌〈一呼一吸〉有很多句子在音樂的 scale 上是以 ti 開首（即是 do re mi 那些） ，是很不尋常的做法。「呢首歌有啲位係怪點嚟，好幾句開波係用第 7 音，好犯規，但唔知點解就出咗嚟，唔係刻意去諗。」歌曲與另一個 Adrian——Adrian da Silva（Audiotraffic）合編，是他相識幾十年的老友，最初二人本來只是在家中喝喝酒，但音樂人就是任何時候都要拿樂器出來彈彈，結果〈一呼一吸〉頭幾個 chord 就出現了。「Feel 到個 chord 之後，melody 點嚟就點嚟㗎喇」，也包括了符致逸口中好犯規的旋律，「聽聽吓又 ok 喎，就 keep 住喺度」，隨心而寫，不怎麼雕琢，是他現時喜愛的「創作方法」。
Adrian 表示，〈一呼一吸〉簡單來說就是對愛的一種幻想。「想做一首歌詞同旋律都比較抽象化嘅歌，希望當曲、詞、編結合嘅時候，就有種好特殊嘅感覺出嚟。」據知填詞人鄭敏的靈感是來自電影《花樣年華》，「我個 visual 就貼地啲，諗住微雨中同個女朋友喺巷仔漫步㗎咋！」
符致逸過去幾首主打歌的風格都很 80、90 年代，他說並不是刻意的。「我由細到大，鋼琴老師都唔畀我聽流行曲，只係聽 classical，到 90 年代差唔多讀大學時，先開始聽 pop songs；大家都知讀緊書時聽嗰啲音樂，係特別令人記住，我啲歌好自然就會跟返嗰個時代。」我們總覺得成長時聽的音樂，是最好的音樂。問到會否擔心因此難以吸納新一代的樂迷，他說不用想太多。「啲 feel 係舊少少，但 Bruno Mars 都係玩舊嘢啫，有時唔需要太多 label。」
其實符致逸也不是只懂得懷舊，他說最近在聽 The Weeknd，也一直喜愛 Massive Attack 那類 trip hop 音樂（儘管 Massive Attack 也是 90 年代的樂隊了），並非大家想像中的老舊騷靈與藍調。去年他為向達明一派致敬的專輯《達明一代》貢獻了一首〈恐怖份子〉，就帶點迷離氣息，和〈無非一聲掰拜〉、〈靈魂獨舞〉等截然不同，他也可以寫一些不同的音樂。「第一次聽〈恐怖份子〉，我留意到明哥唱嘅時候係好多 syncopation，我就捉住呢一點，做一個好 steady 嘅 drum beat，凸顯 vocal 也是很 syncopated。我想做啲唔同嘅嘢，既然明哥咁型，都要做啲型啲嘅嘢先得。」
會不會在不久的將來作更多不同的嘗試呢？他說作為一個幕後作曲人的話，當然會。「因為啲歌唔係寫畀自己，但好多時我寫歌，我控制唔到自己寫咩出嚟，即係一出嚟我覺得好聽，呢啲係我對音樂世界嘅一個表達，我唔係坐喺個琴前面講：let’s make some 90s music，係寫吓寫吓、搞吓搞吓就變成咁，編曲個 process 就會形成咗首歌個靈魂出嚟。」做自己的音樂，更須要隨心，太刻意求變，就可能失去靈魂，是一個兩難之處。
那麼，怎樣的音樂才是屬於符致逸的音樂？他會如何形容自己的創作風格呢？「如果對方唔係行內人，我通常會講 Piano Rock，佢哋就會明白你係彈琴，但唔係蘭花手嗰啲。如果同資深音樂人傾偈，問我鍾意玩咩嘅話，我會話有少少 soul 有少少 blues 又有少少 rock，我覺得我啲嘢係咁樣。」但 Adrian 強調自己甚麼音樂都聽，沒有甚麼類型是特別厭惡的，「作為一個音樂人我覺得咩都要聽，你未必須要鍾意、要 follow 佢哋，但一定要聽咗先，同埋懂得欣賞。」
連同〈一呼一吸〉在內，過去幾年符致逸已發表了 5 首單曲，基本上已夠數出一張 EP，不過他說新碟還在籌備中，這一年仍會有新歌推出。差不多 4 年前，符致逸在台灣推出過一張國語專輯《Good Morning, Hard City》，他說希望新碟會是一個延續。「《Good Morning, Hard City》主題就係大都市生活，反映我當時有 day job，同時又幕後寫歌。我希望新碟係探討我 quit 咗份工到而家，我經歷嘅所有 emotions，由非常之開心，終於可以全職做音樂，到出歌有人支持，但同時又有人批評，跟住就被打擊咗少少，有少少唔開心同失落，然後質疑自己有冇做一個啱嘅決定，之後我就開始 meditation，情緒上好返啲，走出谷底。初步諗法係咁。」
不少得的，當然是 Jim Lee 的精彩製作，多年來，Adrian 一直與他合作無間。當年得到 Jim Lee 的賞識，符致逸的歌才有機會被選用，其後陳奕迅更演繹了他不少創作，令他的名字開始為人認識，當中包括超級經典〈我們都寂寞〉，是 Adrian 於 19 歲時所寫的。在音樂事業上，Adrian 對 Jim Lee 是無限感激，說「佢係我嘅全部」。
新碟當然繼續由 Jim Lee 操刀。「業界好多人都講，Jim Lee 無論做乜嘢，好多人都描述唔到點解咁好。好似〈一呼一吸〉，成個氣氛係好 rich 好 full，但其實只得一部琴、一個 electric piano、一支 bass，一支結他、一 set 鼓，再加有少少 background vocal，係咁多，6 條 tracks 搞到好大。除咗佢 mixing 嘅功勞之外，佢畀 session musicians 嘅指引係畀得好好，夾埋出嚟就係好多好嘢。」
Adrian 說他很滿意現時已發表的幾首作品，但也明白，別人是否喜歡，並不是他所能控制的。他在 YouTube 的 mv，總有一些激進份子不停罵他。「我以前會好緊張反應，舊年我就開始覺得，諗咁多做乜呢」，Adrian 近年開始做 meditation，漸漸想通，「可能嗰個人，被迫日日坐喺老麥，當你日日 loop 住我首歌，工作又有壓力，如果唔好心情都想鬧人嘅。我整體深信，當你做好一件事之後，just let it speak for itself。」
「出咗首歌，somehow 我覺得首歌已經唔屬於自己，係屬於大家。有時聽自己嘅歌，我都覺得自己係聽眾，會研究呢首歌，會批評呢首歌；有啲 friend 話：乜你咁鬼自大嘅？又聽自己歌？我話唔係呀，我想聽清楚結他個聲質，咁我可以記住。」談起音樂，Adrian 特別眉飛色舞，訪問期間他就跟筆者分享近期喜愛的音樂，其中一首是電視節目《The Late Show with Stephen Colbert》的樂曲：Joe Batiste 領導樂隊 Stay Human 演奏的〈Humanism〉，Jazz 得來又 funk funk 地，令人聽得心曠神怡、精神爽朗。
對於幕後與幕前的工作，Adrian 自言都十分享受，但哪一樣更適合自己，他說現時回答還是言之尚早，「過多幾年先算啦，碟都未出！」是的，樂迷都很期待這一張專輯，會是今年內的事吧？
緊貼最新資訊，請關注 SPILL 的 MeWe 專頁、Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。
