網上組隊

「我和 Matthew 是在高登認識的。」結他手 Jeff 說來淡然，已一把年紀的筆者還是有點錯愕，只能說時代真的不同了，搵 band 友的方式也不一樣。Matthew 是低音結他手，他本身認識鍵琴手 JNY，Jeff 則認識鼓手 Kay，恰巧 JNY 正透過 facebook 找志同道合的人組一支玩 R&B、Groovy 風格的樂隊，音樂喜好都差不多的這 4 個大男孩便組成了 Dusty Bottle。「塵封的酒樽」是否會盛著更醇的音樂？

Jeff 說 4 人「原本是完全不同的圈子」，不過相近的音樂品味讓他們走在一起，同樣喜愛 The Roots、The Weeknd、Drake、The Internet 和 Robert Glasper 等歌手組合的音樂，「鍾意這類音樂的人很多，但玩就很少」，Dusty Bottle 過去兩年參加過無數樂隊比賽，他們說沒有遇過任何樂隊玩類似的風格，更笑言曾擔心被「歧視」，「其實好多樂隊都好 nice 嘅，佢哋覺得有更多唔同嘅元素，都係好事。」

後來 JNY 得知獨立廠牌 Brave Nusic 蓄勢待發，便寄 demo 自薦，唱片公司也覺得不錯，Dusty Bottle 很快便被羅致成為旗下第一批 artists。而 Demo 中也包括了〈Don’t You Know〉這首歌。

與王嘉儀一拍即合

Dusty Bottle 這一年的計劃，便是找不同的女主音跟他們合作，上次〈That Shit Raw〉有 Shimica 獻聲，新歌〈Don’t You Know〉則找來王嘉儀（Sophy）客席主唱。「我哋聽咗《Quarter》，好鍾意裡面嘅〈In Between〉和〈翩翩〉，就搵佢上嚟 band 房試試，一聽就覺得啱呀、正呀，就係我哋想搵嘅嘢喇！」Jeff 說起來眉飛色舞，狀甚浮誇，彷彿這個讚美已壓抑了很久一樣，「你知我哋男仔有少少怕醜，當時無即刻表達，但真係好開心有把咁正嘅聲音喺首歌入面。」

Sophy 是先聽到〈Don’t You Know〉的 demo 才認識 Dusty Bottle 每一位成員，她說想合作是因為覺得這個音樂類型很適合她。「首歌感覺好 sensual、好型格，我覺得透過音樂去認識，而唔係圍威喂呀、friend 呀，令呢件事更加美好，係純粹因為呢首歌令我想同佢哋合作。」Sophy 笑言 Dusty Bottle 真實的一面和他們的音樂不太一樣，「佢哋個個都係有傻氣同搞笑嘅一面，始終大家都係後生仔，會講無聊嘢，但咁樣先好玩，可能因為都係做緊自己鍾意嘅嘢，所以都係 Let’s have fun 呢個心情，我鍾意呢個 element。」

然而，作為一名創作型歌手，Sophy 不只是唱歌咁簡單，也會先跟 Dusty Bottle 溝通一番才正式「開工」。「第一次見就係去到佢哋 band 房，然後就一齊聽一啲我哋喜歡嘅 reference。我鍾意嘅 sound 係比較 chill，soulful 一啲，佢哋就較為 Hip Hop，咁我哋就互相交流，譬如聽咗 Sabrina Claudio，我哋都覺得好正、好 sensual，好鍾意嗰個 feel。」

Jeff 表示，〈Don’t You Know〉也因為 Sophy 的加入而作出 arrangement 上的改動，「我哋都想營造到佢想要嘅氣氛」，所謂音樂交流，大概就是這個意思了。

Sophy 也稍稍修改了歌詞，令自己更能投入到歌曲當中。「因為我係好難唱人哋嘅語言，我覺得既然搵我 feature 嘅話，係應該投放一啲自己嘅角度落去。原本嘅歌詞係寫得比較 passive，不斷唱 you keep coming on my way，但我覺得應該係『我哋要有啲嘢發生』，個性格會啱我多啲」，於是，現在的版本就變成了 we got something in our way，角度不同了，更為主動，聽起來也多了一點時尚女性的味道。

適合都市人聽的音樂

問 Dusty Bottle 會怎樣形容自己的風格，他們說是「令人舒服又肉緊的樂隊」，「我諗我哋會有兩種 vibe，一種係 chill，一種係 groove。Chill 係想大家舒服，另一邊係想個 groove 令大家忍唔住一齊 ‘un’。」

〈Don’t You Know〉推出後，外界反應很不錯，更曾攀上 iTunes 單曲榜的三甲，Sophy 也表示很興奮。「喺香港要做呢種類型，仲要係英文歌係比較難，但呢個成績證明咗係有呢個空間，大家係鍾意聽。只要樂迷多啲接觸呢種類型，就有可能會愛上，我覺得呢樣嘢係 slow burn 嚟」，她說這類節奏未必像 Pop 或 Rock 一下子就令人留下深刻印象，「但我覺得係好 tasteful，慢慢滲入去，好適合都市人聽。」

這麼說來，這類較為 Soul、R&B 的類型，在市場上的位置似乎也沒有想像中那麼低。Sophy 更表示，從來不覺得音樂類型是一個限制，「當然普羅大眾會覺得 Pop 係容易入屋啲，但譬如我嘅音樂，你話純 Pop 又唔係，純 Soul 又唔係，只係將我喜歡嘅嘢 fuse 埋一齊，講到尾首歌係好嘅、表達得夠準確嘅，大家自自然然就 get 到」，Jeff 也同意，認為類型不過是個標籤罷了，「其實係俾大家清楚啲知道我哋係做緊乜嘢，但無論係 Soul、R&B 定 Pop 都好，最終我哋係想做一首好嘅歌出嚟。」

Chill 住聽的生活態度

這年 Dusty Bottle 的歌曲都會以英語為主，他們表示明年會嘗試做中文歌，但 Jeff 強調甚麼語言其實並不重要。「都係睇演繹把聲點，好似 Sophy 啲歌都有廣東話，都好正，我諗都係睇個結果好定唔好，如果有個泰文唱得好好聽都可以試吓㗎！」Dusty Bottle 將於年底推出首張 EP，還會跟哪些女歌手他們暫時要賣個關子，只說音樂風格會與現時我們聽到的兩首歌有一點不同。

訪問期間不難發現樂隊成員之間是頗融洽的，Jeff 說「鍾意 Hip Hop 嘅都係 Love & Peace」，沒有仇恨，也不存在太多爭拗，畢竟大家的喜好相近，同時性格也很突出，「未必像 Rock band 一樣有兩個結他手或者會帶來分歧，大家都係為件事好」。加上 JNY 本身是 producer，「idea 好清晰，on top 雕少少花已經 okay」，相處和合作的態度就和他們的音樂一樣，非常 chill。

問到樂隊的目標，JNY 說希望他們的音樂是普羅大眾都會喜歡，「希望全部人都感受到呢個 groove」；Jeff 則說自己因為自小玩古典和 flamenco 結他為主，對音樂的認知較為「藝術」一點，「希望音樂可以成為大家都體會到嘅藝術、大家都可以有嘅 taste，聽歌變成我哋一種生活態度」，他說香港人生活急促，希望大家能感受一下這個 vibe，還笑言該多去看 Dusty Bottle 的演出，「現場和 CD 可以是兩樣完全唔同嘅 vibe，應該要聽晒兩個 versions！」沒錯，現場演出才能展現樂隊的真正魅力，Dusty Bottle 的演出更是充滿著都市觸覺，很貼近我們的生活，也是逃離鋼筋森林輕鬆一下的好方法吧。

緊貼最新資訊，請關注 SPILL 的 MeWe 專頁、Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。