因放負而起

都說了筆者是老樂迷，訪問 Robynn & Kendy 的時候，總是以「新曲加精選」來稱呼這張《CURATIONS》，Robynn 聽到也笑言：「可唔可以唔好咁形容？我好唔想叫佢做精選。」大概是因為，過往一般新曲加精選根本不會有 9 首新歌那麼多，這個數量本來就能獨立成碟了。如今唱片市道持續低迷，「大件夾抵食」似乎仍是個吸引樂迷的好方法，「如果樂迷真係由〈負攝石〉開始聽我哋，都可以透過 CD2 去了解多啲，咁可能都係一件好事嚟嘅。」

一切由〈負攝石〉這首歌說起。那時候，Robynn & Kendy 沉寂了一段時間，因為《中國好聲音》這個節目，她們開啟了國語歌市場，一直忙於到處宣傳、演出，少了在香港露面。「完咗《好聲音》同國語碟嘅所有嘢之後，好似有一種好空虛嘅感覺」，她們覺得身心俱疲，很想靜下來，想想之後的路向。籌備新碟的時候，她們最初也沒有想太多，便以「just for fun」的心態與 T-ma 合寫歌曲，「都唔理係咪似 Robynn & Kendy 嘅作品了」，結果，〈負攝石〉誕生，點到即止的電子元素讓人耳目一新，卻又不失她們原來的 acoustic 清新感覺，「〈負攝石〉kickstart 咗呢隻碟所有嘅嘢。」Robynn 這樣形容。

尋找新聲音

別忘了，國語碟《如果．我不完美》早於 2015 年推出，〈負攝石〉則在 2017 年初派台，2016 年 Robynn & Kendy 完全沒有新作推出，所以當〈負攝石〉正式面世時，她們都有「真係好喇，可以做返廣東歌」的感覺。

她們表示，那靜下來的一年，因為一直在想方向，反而沉澱了下來。「其實我哋一出道就自彈自唱 acoustic 嘢為主，咁經歷咗《好聲音》，再經歷 15 年嘅國語碟之後，就有『跟住落嚟可以點』嘅諗法。於是 17 年開始就 release 咗一啲完全唔係小清新嘅歌，呢隻碟係概括咗我哋點樣尋找一個新嘅聲音，尋找一啲唔同嘅可能，對我哋嚟講都係成長嘅一部分。」

追隨多年的樂迷亦不用擔心，Robynn & Kendy 只是想增加更多音樂上的可能性，不至於要推倒昨日的她們。「啲人可能會仲好掛住以前嘅我哋，但我好希望呢隻碟可以話到畀大家聽，我哋成長咗、多面咗。唔係話之前嘅嘢就抹走咗，就唔做，嗰啲都係我哋好重要嘅部分。」

不刻意為之

有趣的是，這個蛻變的過程不是刻意追求的，而是很自然便發生了。Kendy 說寫〈負攝石〉的時候，沒有想過要走一個怎樣的路線，「其實都係拎住結他同 producer T-ma 一齊諗，jam 咗一陣跟住就哼吓 melody，我覺得創作過程都係好 organic，覺得呢度可以加呢個聲，嗰度可以咁之類，無諗咁多」，然而這樣卻為 Robynn & Kendy 開啟了一道門，加上外界反應不俗，之後便有更多不同的嘗試。

新碟《CURATIONS》最有趣的地方，就是每首歌背後都有故事可說，就像一件又一件展品。「Curations」是「策展」的意思，意味著當中的展品（歌曲）都是精心挑選，不是「為揀而揀，為擺而擺」，這個大碟標題的構思來自當中一首歌〈未來紀念館〉，歌詞是鼓勵大家，做更多能令自己日後回望會覺得自豪的事情，無論你是誰，都可以有屬於自己的未來紀念館。「我哋隻碟就係我哋個博物館，啲歌就係我哋嘅展品。」

Robynn & Kendy 說，希望大家聽《CURATIONS》時，有如經歷了一個旅程。她們編排曲目的時候，本來只是以音樂的氣氛、風格、連貫性作考慮，卻意外地發現，當中隱含著「步向光明」的感覺。「所以〈負攝石〉同〈明陣〉放喺頭尾係好有意思，〈負攝石〉係無出口、一個發洩嘅狀態，〈明陣〉就講行來行去、兜來兜去，但總有一個出口等緊你。」〈明陣〉放在最尾，也有開展新一頁的意味，儘管曾經迷茫，但最終發現，前面仍有很多可能性。Alex Fung 感覺宏大的編曲，也像在呼應〈負攝石〉的電子元素，「所以我哋覺得呢首歌可以係一個 finale」。

暗中尋光茫

她們強調，每一首歌都是很自然地誕生出來，沒有太多的計算。譬如寫〈明陣〉時本來是打算寫一首慢歌，卻在製作過程中加入了很多 idea，變成現在大家聽到的模樣，「創作就係咁得意嘅一回事，有時特登計反而唔真誠」，那麼，Robynn & Kendy 這兩年的心態也是從暗黑到漸漸找到光明嗎？「都係，曾經處於一個好 stuck 嘅狀態，依家明白所有嘢都係一個磨練，就算有彎路、有難關，都係個天要你學一樣嘢。」

《CURATIONS》另一個特色，就是找來很多不同的音樂人合作，譬如林家謙、馮穎琪、蘇道哲和 Alex Fung 等，「都想睇吓其他音樂人點睇我哋」。

Robynn 說與馮穎琪合作特別開心，「我哋認識咗 Vicky（馮穎琪）好多年，但未合作過，我覺得一切係有種緣份。本身諗住只係搵佢作曲，但我哋 A&R 覺得呢隻要係完完整整 Vicky Fung 嘅作品，咁啱佢嗰陣睇咗一半書叫《荷光者》，於是就寫咗呢份詞。對我嚟講，係會提醒咗我哋身邊真係有好多伯樂、荷光者，帶咗好多能量、光茫畀我哋。」

隨心就事成

說起來，這樣邊創作、邊派台的模式，倒成就了《CURATIONS》這張專輯。要不是經過了兩年成長歷程，《CURATIONS》也不會是這個模樣了。「我哋 Robynn & Kendy 嘅事業路說不上好慘乜都無，但亦說不上好順；但如果所有嘢好順，〈負攝石〉、〈世界對我們〉呢啲就唔會存在，我哋就算唱，人哋都唔會有一樣嘅感受。我覺得藝術就係反映我哋經歷嘅所有，而我好慶幸我哋有呢啲經歷，喺做呢隻碟嘅過程當中，搵返個希望。」

問到下一個階段的路會怎麼走時，她們同樣抱著這種隨心的態度，「我覺得有咩諗法都假，做咗出嚟都唔會係我原本嗰個諗法，我覺得隨緣囉，最重要心態上係繼續去、唔放棄。」

最後我問了「例牌」題目：最近在聽甚麼歌。Kendy 答我 John Mayer 和 Honne，因為他們先後來了香港演出，Robynn 則說常聽泰國唱作人 Phum Viphurit，以及內地女 rapper Lexie Liu（劉柏辛）的歌，並表示相信這些風格會成為未來一大趨勢。都和 Robynn & Kendy 的音樂很不一樣啊，將來她們會有這些新嘗試嗎？拭目以待。

鳴謝場地提供：The AIR（The One）

緊貼最新音樂資訊，請讚好/追蹤 SPILL 旗下的「Overflow 音樂滿瀉」Facebook 專頁及 Instagram 帳戶。如欲訂閱 Overflow 的電子通訊可按這裡。