The Past：無意識的生活

轉投環球唱片之後，Gin Lee 的名字比從前更響，去年推出的《beGin》更獲得金唱片殊榮，並且有很不錯的口碑，稱得上氣勢如虹了。她也表示對成績很滿意：「當然各方面都可以做得好啲，但隻碟叫《beGin》，即係『開始』啦，對我嚟講係啱啱開始㗎咋，仲有好多嘢要慢慢攞出嚟。」Gin Lee 說話也比起從前更有自信，卻又不失親切感，說：之後更重要。

之後，就是《Live in the Moment》。Gin Lee 說這是她歷年來參與度最高的一張專輯，從構思、創作到製作都有給予意見，樂迷可聽到更多她想表達的意念。「Live in the Moment」就是活在當下的意思，為了表達這個主題，形式上選擇了以 live recording（現場同步錄音）的方式灌錄，早前她與劉美君合唱了一曲〈Torn Between Two Lovers〉，也是以同樣的方式製作。

不過，新碟的概念其實早於〈Torn Between Two Lovers〉出現之前已經落實。「上年一出完《beGin》已經度緊，成個 project 首先係有 Live in the Moment 呢個 theme 先，我就諗點樣將呢個 message 呈現出嚟呢？咁 live recording 係一個方法。」

但何以會有這樣的構思呢？「呢幾年喺呢個城市生活，步伐好快、好急，對我嚟講係要去適應、學習，我又畀自己好大壓力嘅，我不嬲都係一個咁樣嘅人，逼到自己好辛苦，感覺直頭就嚟爆炸，於是就諗：生活係咪就係咁樣呢？」Gin Lee 說，當察覺自己瞓又瞓唔好、食又食唔到，就知道警號響起了，「同家人、朋友嘅關係好似爭啲咁，點解有啲人同事變咗，我好似無察覺到呢？」後來她想通了，當你忙到一個點，對生活就會變得無意識，因為 focus 一件事已經很困難了，又怎會留意到周遭的事物、當下的一切？

《Live in the Moment》就是一張關於這種狀態的唱片，在專輯漸漸淪為「singles collection」的今天，難得有一張概念完整的 concept album，實屬喜事。當然，現在的 Gin Lee 依然很忙（甚至更忙），但她說心態可以改變，「唔會再令自己去到抖唔到氣嗰個狀態」，到醒覺時才發現甚麼都離自己很遠時，就太遲了。

The Present：活在當下

說回 live recording，因為第一次做，所以並不易掌握，「呢個係一個挑戰，亦係覺得好玩嘅地方。開頭係有啲緊張，因為唔知道會係點樣嘅一回事。」一般唱片的製作方法是逐首歌慢慢錄，但 live recording 就要所有歌都準備好，一次過錄，前期功夫特別多，「最頭痛係度期，平時係度我、監製同埋 studio 個期，而家有 4 個 musicians，佢哋都唔係好得閒嘅人，都有好多巨星嘅世界巡迴做緊，係超級難去就時間。」

加上製作費緊絀，只能花 5 日時間錄音，於是一眾牽涉在內的製作人員與樂手，便要在 5 日之內完成 8 首歌的錄音，歌手的實力不夠便會很累事。當然，Gin Lee 絕對有足夠的實力應付，每首歌都在 10 個 takes 以內錄好，一日可以錄起一兩隻歌，比起過往幾日錄一首更有效率。「最難其實係心態上嘅調節，要好專注，因為 live recording 係一 take 過，個 focus 係要維持成首歌，平時會覺得唱錯就再嚟過，或者只係補某一句，但而家係唔可能。有啲似唱 live，但要再多啲細節。」

相比《beGin》，《Live in the Moment》有更多快歌，Gin Lee 說是故意安排的：「我嘅快歌唔多，過去 5 張唱片都係慢歌為主，想試多啲唔同嘅嘢。」新碟也有更多不同的音樂風格，譬如〈隨風而來 隨風而去〉是 Brit Rock，〈好風如水〉就走 Neo Soul 風格，都讓人耳目一新，「我一路好想試 soulful 一啲嘅歌，但呢啲真係要搵人度身訂造先得，就同 Alex（馮翰銘）傾我想點樣做。」

The People：三位監製各具才華

新碟和《beGin》一樣，都由 Eric Kwok、Alex Fung 和 Fergus Chow 監製，訪問中 Gin Lee 也表達了她與每一位合作的感受。

Eric Kwok

「佢係一個好重要嘅角色。佢嘅歌係好易令人有共鳴，佢係有呢個 magic。我知我開呢個 project，好多嘢會當 experimental 咁去做，但為免去得太遠，令人覺得一時間變晒，Eric 喺度就可以令件事有個平衡。我同佢由第一隻碟一路合作到而家，一定要有佢。今次佢 involve 三首歌，一首佢自己寫（〈Live〉），另外兩首：〈空姐〉同〈緣．兩半〉係佢嘅徒弟（分別為 Eye Fung 和 Brian Yip）寫，都係佢新簽嘅。佢哋第一首發表嘅歌都放咗喺呢隻碟入面，係好特別嘅 moment。」

Alex Fung

「上次〈月球下的人〉合作之後，我就知道佢係我下一隻碟一定要搵嘅人，因為我知道同佢仲可以 create 好多嘢。好享受同佢一齊創作、喺錄音室度啲和音點寫，呢啲過程係好正。」

Fergus Chow

「上一隻碟同佢合作得好開心，所以都唔可以少咗佢。我全部嘅 live show 幾乎都係搵佢做嘅，但 10 月 6 號個 show 就唔係，因為夾唔到時間，不過下年嘅 show 我一定會早啲 book 定佢！呢隻碟嘅班底：佢同 Derrick、Padget、Ray（按：Derrick Sepnio、Padget Nanton III、Rayvaughn Covingtion），係我唔使再慢慢磨合嘅 band，我哋嘅默契已經十足。」

《Live in the Moment》製作初期，原意是會有更多由 Alex、Fergus 和 Gin Lee 合寫的作品。「一開始就搵咗 Alex 同 Fergus 一齊，我話我哋三個一定要一齊寫啲嘢，因為我哋都好唔同，我想攞個 chemistry。但三個人一齊最後係寫唔出，co-write 真係好難，有時一嚟就寫到好多嘢，但有時係點都夾唔到。」原來 Gin Lee 和 Fergus 有合寫一首，只是最終沒有放到專輯當中。唯一合寫成功的就只有〈和每天講再見〉，是 Gin Lee 和 Alex 合寫的，最初想寫一首快歌，但慢慢演變成一首慢歌，花了一晚便完成。

The People：七名填詞人發功

《Live in the Moment》全碟 8 首歌，卻有 7 個不同的填詞人，可說是陣容鼎盛。Gin 說是因應歌曲的感覺，以及所表達的主題，去找適合的人，「〈和每天講再見〉我好肯定係搵林夕㗎喇，咁有張力嘅一首歌，一定要有佢嗰份深度同力量」，其他歌也一樣，譬如〈好風如水〉，首歌好 chill，Gin Lee 便想到找藍奕邦，「呢首歌我會諗到海灘，飲杯嘢，因為佢喺加拿大休息緊，可能會有啲特別嘅見解。」

較令人意外的是，〈今朝有酒〉竟找來 C 君合作，填詞之餘還參與歌曲的 rapping 部分，和 Gin Lee 過往的音樂風格很不一樣。「因為填快歌填得好嘅人唔多，仲要 rap 埋，人選已經可以數得出。其實搵佢係 Alex 提議，我話都好喎，又未合作過。」

找每位填詞人之前，Gin Lee 都會先寫一段字給他們，講解構思、意念，以及她對 Live in the Moment 的看法。「但我會後補一句：唔使跟足。我想知道佢哋對『活在當下』嘅諗法係點，同埋點樣表達。8 首歌就有 8 個角度，我覺得好新鮮。譬如 C 君話，作為一個歌手又好，演員又好，每日都係練緊活在當下，因為每日睇到個schedule 都密麻麻，根本無時間諗第二日做乜嘢，只能夠 handle 到今日嘅嘢，對佢嚟講呢個就係佢嘅活在當下，因為佢嘅生活就係咁。」

不過，最終幾乎每位填詞人都寫了和 Gin Lee 那段字不一樣的東西，「跟得最足係林夕，其他已經完全唔同晒。我都唔係想佢哋跟晒，最重要係跟返個主題。」唯獨潘源良寫的〈緣．兩半〉，最初 Gin Lee 曾以為是離題，「我當時收到呢份歌詞係有啲失望，我同潘 Sir 講，我明明寫得好清楚，點解寫出嚟同個 concept 無關係嘅？」原來歌詞的靈感來自電影《天煞異降》（Arrival），戲中外星人的語言是一個圈一個圈的，潘源良就把每個人比喻為一個半圓形，要在 right timing 兩個半圓形才會走在一起，成為情侶。「〈緣．兩半〉係講兩個人要在同一個當下先會成事，我同 Eric 開頭都唔明，佢一解釋就即刻明咗。」

The Future：參與更多幕後製作

做了一張關於「活在當下」的專輯，那麼，Gin Lee 又是一個會好好計劃將來的人嗎？「Plan 唔多唔少都要嘅，但我發現自己最大嘅變化係，以前會重視個結果，設定咗一個目標係一定要完成，但而家覺得過程更加重要。」但她說，最渴望的還是能達到一個理想的生活模式，「當然開紅館都係一個目標啦，但最 ultimate 嘅一個 goal 會係理想嘅生活模式。工作係好重要，但點樣過我嘅生活係更重要。」其實，和「活在當下」的意念並沒有衝突，最終都離不開生活。

音樂方面，她說希望參與更多監製的工作，因為感覺更加「完整」。「寫歌只係其中一個部分，但 produce 牽涉曲、詞、mixing、mastering，甚至文案點寫，所有嘢都關我事。我覺得我有責任去諗我嘅音樂點樣完整啲表達出嚟，盡可能都畀啲意見。」

她說這次跟 Fergus 和 Alex 合作特別開心，因為他們的作品都有很強的音樂性，有好多 layers，「鍾意音樂嘅人會好 enjoy，但同時都有一班人會覺得唔好畀咁多嘢我，消化唔到，所以喺一張專輯我都要攞個平衡。我想慢慢 prepare 我嘅歌迷，可能 5 年後我嘅音樂會好 experimental 都唔定，我覺得係一個進化，要慢慢去變。」

Gin Lee 過去一兩年參加了一些大陸的音樂節目，在當地知名度大增，問她為何不乘勝追擊，在大陸或台灣大展拳腳，她說「因為鍾意喺香港」。「開始咗嘅嘢要繼續 work on it，而且我想再鞏固喺呢個地方嘅音樂形象，先去其他地方。國語碟一定會出，始終係我嘅母語，但我覺得要喺啱嘅時候做啱嘅事，呢個時候我覺得係要將粵語專輯做好先，或者下一隻或下兩隻會做國語啦。」當然，我們根本不會介意繼續聽她唱廣東歌吧？

緊貼最新資訊，請關注 SPILL 的 MeWe 專頁、Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。