目標：年產過百歌詞

願望達成了，而且很成功，怎麼還有下一步？「莫非我反口覆舌？」陳詠謙笑說，然後就一臉認真的樣子。「係真嘅，我所做嘅每個決定，都係為咗我可以成為一個填詞人。我亦好幸運，持續有歌詞寫。但你知入行有幾難啦，而填詞比作曲又更難，所以只能相信念力。所有同填詞有關，或者可以令我親近歌詞多一啲嘅嘢我都會接觸，不論人好事好。」

這個念頭，陳詠謙說做學生想像未來的職業是甚麼時已經有。於是他入讀港大音樂系，又到商台當撰稿員，大概都是為日後「可能」成為填詞人而鋪路了。目標如此清晰，抵佢成功。

只是都成功了，何以又跑去做歌手？「我覺得無衝突嘅，我一邊唱歌嘅同時，其實都寫好多歌詞。我仲想今年成為最多產嘅一年。我想畀一個訊息大家，我唔會因為要唱歌而唔寫歌詞，我仍然係一個填詞人，填詞仍然係我最鍾意做嘅事，亦都係我嘅本位、我嘅身份。」

陳詠謙說這也是一項自我挑戰，兩年前他兩度奪得叱咤樂壇填詞人大獎，他說之後反而有點迷失，所以過去兩年寫的歌詞並不算多。「每個創作人都有創作周期，過去兩年狀態比較差，咁今年好返啲，就應該要把握呢個時候。」他的目標是一年寫 100 首歌詞——不算多了，林夕試過一年填 200 首，黃偉文也有過一年 120 多首的紀錄。「我知道將來某個時候係會乾涸的，又或者我寫嘅嘢已經唔被呢個時代、時下嘅人所接受，所以我要趁而家寫多啲。」

當歌手：寫詞無包袱

至於當歌手，原來是由一句戲言開始。好幾年前，他寫的歌詞常常被人修改，大部分時候連知會一聲都沒有，「當時經驗不足，唔知道一首流行曲的意義和作用係乜，亦未摸得清監製、歌手、唱片公司、市場需要啲乜，一味自己覺得好玩、自己覺得有意思，忽略咗協調。」

過後回想當然理性，然而當時歌詞被改，他是相當憤怒的，還跟公司說：我自己唱咪唔使改囉！豈料卻換來朋友一個很認真的回應：而家未係時候，等你填多兩年歌詞先啦。那時是 2010 年。

本來只是「講吓咋喎」的一句說話，過了幾年竟然被舊事重提。「我都將呢件事放低咗，但有日呢位朋友同我講：我心血來潮行入老細房話你想唱歌，佢話有得諗喎！」結果，陳詠謙要成為歌手了。

雖說本是戲言，但陳詠謙其實也很感興趣。「我係一個唔抗拒機會、傾向把握機會嘅人，那怕呢條路我從來無諗過行。如果架車唔小心早咗轉彎，去咗一個唔係我本來想去嘅地方，我都會花啲時間去 explore 吓嗰個 area，你點知會唔會係自己一啲未 expect 過但鍾意嘅嘢呢？」

陳詠謙強調，雖然他由細到大都有唱歌，但從來沒有想過當歌星，更不會發明星夢。不過填詞人可以唱自己填的歌詞，感覺是好有趣。「寫歌詞係一個好孤單嘅工作，長期都係同自己溝通，我嘅同事就係我自己，咁有機會喺音樂世界以另一個身份接觸更多人，係幾開心嘅。」

更重要的是，有些題材不是隨便可以寫給人唱。太私人的、與別人無關的，又或者題材太大膽的，這些風險不會隨便放在歌手身上。這個年頭，很多歌手一年只製作幾首歌，如果一首歌就如一發子彈，最好百發百中。「所以我幫其他歌手寫歌係有個目標，而幫自己寫就無咁多考慮，無咁多包袱，咁呢個亦都係做歌手嘅原因。」

創作：半真實半虛構

《Confession》這張專輯就是陳詠謙所說那樣，相當私人，但他說這並非刻意構思出來的，「呢隻碟一開始係無一個好完整嘅企劃，我係邊做邊諗，忽然間有隻〈寫妳太難〉，忽然間有隻〈脂肪葡萄〉，忽然間有隻〈給兒子的信〉，就好似跟住我嘅生活而變化咁」，他說沒有想過是否賣錢，笑言這是唱片公司的考慮，「填詞，人哋搵得我，一定係有個願望，我係幫人達成願望。反而我自己寫嘢就任性啲，係一個自我抒發，甚至連願望都未必有，無目標㗎我做歌，好純粹㗎咋！」他感謝唱片公司願意投放資源，讓他自由自在玩一隻碟，雖然沒有強勁的宣傳，但製作畢竟都要錢，「呢個福氣係寫咗幾年歌詞賺返嚟嘅！」

既然說《Confession》載著的都是私人的情感，那麼選〈告白〉、〈字花〉來翻唱，又是否隱藏了甚麼意思？「我覺得呢兩隻歌喺我嘅作品裡面，有佢自己好特別嘅氣質，而我而家可能已經寫唔返。一個人在乎啲乜、執著啲乜，係會變嘅，呢兩首歌記錄咗我當時嘅 sensor。」是你的故事？「我話畀你知係咪我嘅故事就好無趣嘅，老實講，我寫歌點都係寫啲真嘢寫啲假嘢。我話唔係，聽嗰個都覺得係啦。李宗盛寫『然後好幾年都聞不得、問不得女人香』（筆者按：來自縱貫線〈給自己的歌〉），你係咪就要問佢其實係邊個令你幾年都聞唔到女人香呢？佢都唔會答你啦。」

問到陳詠謙這一兩年當歌手有甚麼滋味，他說最初不太懂得享受，反而有好大壓力，儘管他過往其實不乏上台唱歌的經驗。「以前無人知我係邊個，即係等於我喺浴缸唱歌咋嘛，而家多咗人知我係邊個，我會聽到好多聲呀，覺得佢哋會諗：填詞人走嚟唱歌？好勁㗎佢唱歌？好地地填詞咪算囉，發咩明星夢啫？填詞你都唔係叻啦！」他說最初驚多過嘆，但經過兩年的調整後就好得多了。

展望：年底新碟求突破

音樂上，陳詠謙說《Confession》屬於一個摸索階段，歌寫好了就交給監製，沒有甚麼要求。「我怕第一次就咁多意見呢，好似⋯⋯」你不是一個很有自信的人嗎？我問。「我係一個好有自信嘅人，我覺得我有天份嘅地方我唔怕認，但我唔叻嘅地方我都唔怕認，呢個好重要。有自信係一種責任嚟㗎，喺呢一行，好多人好迷失，好多人唔知想點，好多時候就係有自信嘅人出嚟做一粒定心丸。」〈脂肪葡萄〉說叻仔可以肥，其實也可以作為別人的嚮導，不過陳詠謙說音樂上仍未建立到這個信心，所以總是在想別人怎麼想。

話雖如此，但陳詠謙說到底也唸過音樂，也一直有寫歌的習慣，「只係我無賣歌。我寫歌係咪好叻呢？唔係，但我覺得我寫隻歌出嚟好聽，係唔需要你同意嘅，我覺得好聽就可以。我今次係為自己做，唔需要同咩人負責、交代。」

他說，《Confession》是從陳詠謙出發、講陳詠謙的故事，但下一個 project 就會講某一類人的生活體會、對於人生的想法。沒錯，《Confession》推出了不到兩個月，下一張專輯已在籌備當中了，並打算在年底推出。「我係做每一樣嘢，都想有某種成績嘅人。唱歌嚟講，唔係話我要攞最佳男歌手、年度金曲嗰種，而係我好想做一啲音樂出嚟，啲人聽到會覺得呢種聲、呢種題材，香港係好少有嘅。因為我自知唔係唱歌嘅最好材料，但我都有個抱負，我希望做個 project 出嚟係新鮮嘅、破格嘅，唔想好似主流嘅題材咁單一。我覺得好多生活上嘅事都值得寫一首歌去講吓，我哋有情緒，唔係談戀愛先有情緒。」

高山低谷：那永遠極遠

陳詠謙這麼一說，就使我很好奇，他是喜歡甚麼類型的音樂呢？和他談填詞的人太多了，反而很少人了解他的音樂喜好。「我係聽 Hip Hop、EDM、Jazz 多，最唔聽就係 Rock 同 Ballad！」有趣的是，他偏偏填最多 Ballad，甚至《Confession》裡面也不乏 Ballad，「我嚟緊應該唔會唱 Ballad 㗎喇，我覺得唔係好襯我，要做個情深款款嘅樣，present 出嚟好尷尬。我本身係比較佻皮啲，〈脂肪葡萄〉、〈不趕時間〉就似我喇！」他說他也有深情的一面，只是不喜歡讓人看到，所以這方面的題材，只會寫給其他歌手，「我自己嘅就會歡快啲、跳脫啲。」

況且，情歌仍是最多人要求他寫的題材。「聽佢哋講點解想搵我寫情歌呢，因為我唔轉彎抹角、我直白，喺嗰句就嗰句。大家聽咗咁多年同性戀者或者模仿同性戀者寫嘅歌詞，都係較為婉轉一啲嘅。我擺到明係直佬，寫嘅嘢係硬橋硬馬，好似林奕匡嘅〈難得一遇〉，講就算個天唔畀我同你喺埋一齊，我就走去個天度，撞爛佢度門，搶佢返嚟。」但他強調，情歌可以有很多不同的寫法，要兜個圈寫也不容易，「諗到嗰個圈都叻㗎喎，你諗吓千千萬萬隻流行曲，咁多圈，你仲要兜個無人兜過嘅圈，其實好叻，只係呢種寫法唔係唯一嘅途徑。」

很多人覺得寫人生哲理才叫有深度，作為一個填詞人，總不能「原地踏步」，必須力求「進步」。但陳詠謙說，稱為「演化」更恰當一點。「進步係有高低之分，演化係因為個環境變咗，而演變到適應佢。我合作嘅大部分都係年輕一代嘅歌手，我點會寫啲好深嘅嘢畀佢哋呢？但到佢哋都大喇，而佢哋嘅聽眾都大喇，到時咪寫嗰啲囉，而家聽周柏豪嘅真係著住校服嘅妹妹嚟喎，我點寫人生無常呀！」但這些所謂「深度」的題材，有時也會在他的作品中出現，譬如周柏豪的〈小白〉，除了是對貓的悼念之外，也涉及放下、生命的意義等訊息；周柏豪的〈無力挽回〉，也講生命可貴，要向前看，有些事是我們追不回來的，「呢啲都係人生道理，我會滲入歌詞裡面，但唔會係主題。我覺得音樂無所謂高低之分，係咪一定要寫到啲嘢高深莫測，令大家都敬而遠之呢？我唔想。」

陳詠謙以〈高山低谷〉為例，歌詞用字淺白，但意境深遠。「我相信 60 歲的人聽都有感受，我寫流行曲係要流行，如果流行之外有啟發，呢個係 bonus。」〈高山低谷〉也是他心目中自己的代表作。「我好驚訝呢首歌任何人面對任何事都代入到，有啲人覺得係情歌，有啲人覺得係政治歌，有啲人覺得係貧民歌，講階級、分歧。有啲人甚至覺得有條件做香港嘅國歌，好悲哀。呢首歌係好慘、好絕望㗎，個終點係天邊，個永遠係好遠，唔知點解有人當咗係勵志歌。」但他說，如果有人真的因為聽了這首歌得到鼓勵、活得更好，期待著高山就在前面，也會感到很高興，「但我寫嘅時候係無勵志成份，首歌係為我哋呢一代人寫，我哋好似無乜機會，要攀上去好似好難。唔係我哋怕辛苦，而係上面啲人唔走呀，上面都無位，點上去呢？呢首歌代表咗呢個時代、呢個地方嘅人，佢哋嘅吶喊。」說到這裡，忽爾覺得有點凄涼，還是聽聽流行曲輕鬆一下好了。

特別鳴謝：

髮型：Haysses Ip@HAiR
化妝：Chi Chi Li
場地提供：King & I

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。