「Multi-room」音樂串流有咩好處?
相信不少朋友都聽過「multi-room」,也就是「多房間」音樂串流,簡單來說就是令到客廳以及不同房間入面的器材,可以各自播放不同的音樂。「有咩咁特別?我返房駁隻藍牙喇叭咪可以做到囉!」其實 multi-room 系統最大的好處是訊源、器材之間可以互通,只要接駁到同一個家居網絡,一部手機就可以控制 A、B、C 不同房間播歌,例如家姐在 A 房聽歌,阿哥在 B 房聽,阿爸在 C 房聽聽吓行出客廳,只要手機 App 轉一轉設定,就可以用返客廳的音響繼續播歌。你可能又會講:「香港用家都係住蝸居,邊有三房一廳咁發達!」所以本地用家來說,不同房間播歌只是小優點,multi-room 最大的好處是可以一個 App 控制串流同一個訊源播歌,例如屋企有部 NAS 收藏音樂,房同廳都可以隨時話播就播、一 App 搞掂。