《死侍：不死現身》是首套行貨 UHD Blu-ray 影碟，雖然推出日期一拖再拖，不過最近終於賣街。同時睇過 UHD Blu-ray 同普通 Blu-ray 版，筆者就覺得睇開 Blu-ray 的用家值得畀多幾十蚊買 4K 碟，因為同 DVD 轉 Blu-ray、Blu-ray 轉 3D 的時期相似， 發行都照顧周到，UHD Blu-ray 版入面其實都有隻普通 Blu-ray，未換播放機都可以照睇住先，唔使買咗普通 Blu-ray，第時真係換機先心思思再買過。
《死侍：不死現身》是首套行貨 UHD Blu-ray 影碟，雖然推出日期一拖再拖，不過最近終於賣街。同時睇過 UHD Blu-ray 同普通 Blu-ray 版，筆者就覺得睇開 Blu-ray 的用家值得畀多幾十蚊買 4K 碟，因為同 DVD 轉 Blu-ray、Blu-ray 轉 3D 的時期相似， 發行都照顧周到，UHD Blu-ray 版入面其實都有隻普通 Blu-ray，未換播放機都可以照睇住先，唔使買咗普通 Blu-ray，第時真係換機先心思思再買過。
近年 Marvel 的英雄角色逐個逐個排住隊搬上大銀幕，死侍雖然有少少另類，不過其實人氣幾高。比起美國隊長的正氣（老套？），死侍的「前衛」其實更啱現代人口味。既然叫「不死現身」，都係交代「死侍」點樣變成「死侍」的過程，男主角賴恩雷諾士雖然係大隻佬型男，不過一向都有少少冷面笑匠風格，灰諧加上少少粗鄙，幾適合演繹呢個有少少乸型同變態的死侍。今次 Blu-ray 係三級版，免不了有大量斷手斷腳、穿腸破肚的核突場面，加埋死侍的粗口爛舌，睇得幾過癮。
呢類動作科幻英雄片少不了電腦 CG，所以畫面解像力通常都唔錯，《死侍》都唔例外，畫面相當細緻，當然 UHD Blu-ray 版畫質會更好。畫面解像度有一定的提升，不過未至於令人刮目相看，反而 HDR 和廣色域做出來的效果更加突出，好多背光場面都做得十分像真。黑夜、室內場面亦更多細節，效果相當唔錯。
揸日本刀的死侍出招快、狠、準，影碟音效方面都有呢個風格，頭尾兩段打鬥都相當乾淨俐落，拳拳到肉之外立體感亦都一流。雖然就只有 DTS-HD MA 7.1，不過整體包圍感都幾好，尤其開首的馬路槍戰，低頻夠晒力度，幾個子彈橫飛的場面方向感都相當好。
♦兩段幕後講評
♦刪剪及加長片段
♦蝦碌鏡頭
♦從漫畫走到大銀幕
♦相片集
♦死侍廣告雜誌
♦兩段幕後講評（4K Ultra HD Blu-ray）
《死侍》的特別收錄最主要就是「從漫畫走到大銀幕」呢個製作特輯，半個鐘左右，唔算特別詳盡。不過拍得咁好玩又抵死的《死侍》，工作人員同演員都要有返咁上下「個性」，所以製作花絮和訪問都幾有趣，值得睇吓。
比例：2.35:1
音效：英語 DTS-HD MA 7.1；西班牙、法、德、意大利語 Dolby Digital 5.1
字幕：中文、英文、法文、西班牙文、丹麥文、意大利文等
發行：得利影視
